Mla suspended : राज्यसभा निवडणुकीत पक्षविरोधी भूमिका घेतल्याचा ठपका ठेवत बिजू जनता दल (बीजेडी) ने आपल्या सहा आमदारांना तात्काळ निलंबित केले आहे. या निर्णयामुळे ओडिशाच्या राजकारणात मोठी खळबळ उडाली आहे. निलंबित आमदारांमध्ये चाकरमणी कन्हार (बालीगुडा), नबा किशोर मल्लिक (जयदेव), सौविक बिस्वाल (चौद्वार-कटक), सुबासिनी जेना (बास्ता), रमाकांत भोई (तिर्तोल) आणि देवी रंजन त्रिपाठी (बांकी) यांचा समावेश आहे. हा निर्णय नवीन पटनायक यांच्या अध्यक्षतेखाली झालेल्या बीजेडीच्या बैठकीत घेण्यात आला. याआधी १७ मार्च रोजी या आमदारांना कारणे दाखवा नोटीस बजावण्यात आली होती. त्यांनी दिलेली उत्तरे समाधानकारक नसल्याचे बीजेडीच्या मुख्य प्रतोद प्रमिला मल्लिक यांनी स्पष्ट केले. नुकत्याच पार पडलेल्या राज्यसभा निवडणुकीत भाजपने चारपैकी दोन जागांवर विजय मिळवला, तर बीजेडी आणि भाजप-समर्थित अपक्ष उमेदवारांना प्रत्येकी एक जागा मिळाली. मात्र, मतदानात भाजप उमेदवारांना अपेक्षेपेक्षा ११ अधिक मते मिळाल्याने क्रॉस-व्होटिंग झाल्याचे स्पष्ट झाले. या अतिरिक्त मतांमध्ये आठ मते बीजेडीच्या आणि तीन मते काँग्रेस आमदारांची असल्याचे समोर आले. यानंतर कारवाईचा इशारा देण्यात आला होता. अखेर आज झालेल्या बैठकीत या सहा आमदारांवर निलंबनाची कारवाई करण्यात आली. या निर्णयामुळे ओडिशाच्या राजकारणात मोठी उलथापालथ होण्याची शक्यता असून, संबंधित आमदारांचे पुढील राजकीय भविष्य काय असेल याकडे सर्वांचे लक्ष लागले आहे.
