Bihar Students Protest – झारखंडमधील नोकरभरती परीक्षांमधील कथित अनियमिततेविरोधात सुरू असलेल्या आंदोलनाला आता तीव्र वळण मिळाले आहे. आंदोलनादरम्यान उपोषणाला बसलेल्या सहा जणांपैकी विद्यार्थी नेते राहुल क्रांती यांची प्रकृती शुक्रवारी अचानक खालावल्याने त्यांना तातडीने रांची सदर रुग्णालयात दाखल करण्यात आले, अशी माहिती एका अधिकाऱ्याने दिली.

राहुल क्रांती हे मंगळवार रात्रीपासून उपोषणावर होते. तत्पूर्वी, आंदोलकांनी प्रशासनाकडे आरोग्य तपासणीची मागणी केली होती, मात्र सकाळी ८.३० वाजेपर्यंत घटनास्थळी कोणतेही वैद्यकीय पथक पोहोचले नव्हते, असा आरोप त्यांनी केला होता.

मंगळवारच्या रात्रीपासून दोन महिलांसह पाच आंदोलक ‘झारखंड लोकतांत्रिक क्रांतिकारी मोर्चा’चे नेते देवेंद्र नाथ महतो यांच्या उपोषणात सामील झाले आहेत. महतो हे मागील सहा दिवसांपासून आमरण उपोषणावर आहेत.  (Bihar Students Protest)

दरम्यान, नीट पेपरफुटीच्या मुद्द्यावरून दिल्लीत २६ दिवस उपोषण करणारे प्रसिद्ध सामाजिक कार्यकर्ते सोनम वांगचुक यांनी बुधवारी महतो यांच्याशी दूरध्वनीवरून संवाद साधला. त्यांनी महतो यांना किमान पाणी पिण्याची विनंती केली, ज्यानंतर महतो यांनी पाणी पिण्यास सुरुवात केली.

दरम्यान, झारखंडमधील नोकरभरती परीक्षांमधील कथित अनियमिततेविरोधातील हे आंदोलन शुक्रवारी १४ वा दिवस होता. आंदोलनाची धग वाढवत दोन प्रमुख विद्यार्थी संघटनांनी सध्या सुरू असलेल्या विधानसभेवर मोर्चा काढण्याची घोषणा केली आहे.

आंदोलक १४ वी झारखंड लोकसेवा आयोग नागरी सेवा परीक्षा रद्द करण्याची आणि सर्व कथित अनियमिततेची सीबीआय अथवा राज्याबाहेरील निवृत्त उच्च न्यायालयीन न्यायाधीशांच्या समितीमार्फत उच्चस्तरीय निष्पक्ष चौकशी करण्याची ठाम मागणी करत आहेत. तसेच, जेपीएससी आणि जेएसएससी मधील कारभारात व्यापक सुधारणा करण्याची मागणीही त्यांनी रेटून धरली आहे.