Bihar Election 2025 : आगामी बिहार विधानसभा निवडणुकीच्या पार्श्वभूमीवर राजद (राष्ट्रीय जनता दल) नेते तेजस्वी यादव यांनी मोठे आश्वासन दिले आहे. त्यांनी जाहीर केले की, बिहारमध्ये त्यांच्या पक्षाची सत्ता आल्यास ज्या कुटुंबात सरकारी नोकरी नाही, त्या प्रत्येक कुटुंबातील एका सदस्याला सरकारी नोकरी दिली जाईल.

तेजस्वी यादव म्हणाले, “बिहारची जनता आता परिवर्तन इच्छित आहे. आम्ही आर्थिक न्यायाबरोबरच सामाजिक न्याय साध्य करण्यासाठी प्रयत्न करू. सरकार स्थापन झाल्यानंतर वीस दिवसांच्या आत नवीन अधिनियम तयार करण्यात येईल आणि पुढील वीस महिन्यांत बिहारमध्ये असे एकही घर राहणार नाही, ज्यात सरकारी नोकरी नसेल.”

राजद नेत्यांनी सध्याच्या एनडीए सरकारवर तीव्र टीका करताना म्हटले, “गेल्या २० वर्षांत या सरकारकडे इच्छाशक्तीच नव्हती. आम्ही दाखवलेला मार्गच त्यांनी नंतर नकल करून राबवण्याचा प्रयत्न केला. पक्के घर, स्वस्त राशन, रोजगार – या सर्व गोष्टींच्या बाबतीत हे सरकार अपयशी ठरले आहे. पण आमचे सरकार प्रत्येक घरात नोकरी देऊन आर्थिक स्थैर्य निर्माण करेल.”

तेजस्वी यादव यांनी आपल्या घोषणेला एक नवे घोषवाक्यही दिले – “जॉब म्हणजे जश्न-ए-बिहार”… त्यांनी सांगितले, “जेव्हा प्रत्येक घरात सरकारी नोकरी असेल, तेव्हा संपूर्ण बिहार सरकार जनतेच्या हातात असेल. प्रत्येक तरुणाची सरकारमध्ये भागीदारी होईल.

तेजस्वी यादव यांनी मुख्यमंत्री नीतीश कुमार यांच्या सरकारवरही निशाणा साधत म्हटले की, “हे सरकार लोकांना बेरोजगार ठेवू इच्छिते. निवडणुकीच्या काळात बेरोजगारी भत्त्याची घोषणा करून जनतेची दिशाभूल केली जाते, पण खरी नोकरी देण्याची तयारी नाही. बिहारची जनता आता या भीती आणि असुरक्षिततेच्या वातावरणातून बाहेर पडून परिवर्तन घडवू इच्छिते.”