Bihar Election 2025 : बिहारमध्ये कॉंग्रेसच्या वाट्याला ६१ जागा आल्याचे सोमवारी स्पष्ट झाले. त्यामुळे तो पक्ष मागील वेळेच्या तुलनेत यावेळी ९ कमी जागा लढवेल. बिहार विधानसभा निवडणुकीतील जागावाटपावरून विरोधकांच्या महाआघाडीतील घोळ कायम राहिला. त्यामुळे राजद, कॉंग्रेस हे प्रमुख घटक पक्ष किती जागा लढवणार ते समोर येण्यासाठी उमेदवारी अर्ज दाखल होण्याच्या अखेरच्या दिवसापर्यंत प्रतीक्षा करावी लागली.

कॉंग्रेस ६१ जागा लढवण्यास राजी झाल्याची माहिती मिळाली. वाट्याला आलेल्या सर्व जागांवरील उमेदवार त्या पक्षाने जाहीर केले आहेत. काही जागांवर कॉंग्रेस आणि मित्रपक्षांचे उमेदवार एकमेकांविरोधात लढणार आहेत. त्यामुळे जागावाटपाचे सूत्र ठरवताना महाआघाडीत मतैक्य झाले नसल्याचे दिसते. मागील निवडणुकीत (वर्ष २०२०) महाआघाडीने सत्ताधारी एनडीएला कॉंटे की टक्कर दिली.

मात्र, महाआघाडीचे बिहारची सत्ता हस्तगत करण्याचे स्वप्न भंगले. त्यावेळी कॉंग्रेस वगळता इतर पक्षांनी दमदार कामगिरी केली. मागील निवडणुकीत ७० जागा लढवणाऱ्या कॉंग्रेसला केवळ १९ जागा जिंकता आल्या. त्यामुळे यावेळी कॉंग्रेसने कमी जागा लढवाव्यात यासाठी मित्रपक्षांकडून दबाव टाकण्यात आल्याचे समजते.