प्रभात वृत्तसेवा पुणे – खराडी पार्टी प्रकरणातील आरोपी राष्ट्रवादी काँग्रेस पक्षाचे (शरद पवार) नेते एकनाथ खडसे यांचे जावई डाॅ. प्रांजल खेवलकरने अंमली पदार्थांचे सेवन केले नसल्याचा अहवाल न्याय वैद्यकीय प्रयोगशाळेने (एफएसएल) पुणे पोलिसांना दिला आहे.खराडीतील एका हाॅटेलमध्ये २५ जुलै रोजी झालेल्या पार्टीवर गुन्हे शाखेने छापा टाकला. याप्रकरणी डाॅ. प्रांजल मनीष खेवलकर, निखिल जेठानंद पोपटाणी, समीर फकीर महमंद सय्यद, सचिन सोमाजी भोंबे, श्रीपाद मोहन यादव, इशा देवज्योत सिंग, प्राची गोपाल शर्मा यांना अटक करण्यात आली. आरोपींकडून २ ग्रॅम ७० मिलिग्रॅम कोकेन, ७० ग्रॅम गांजासदृश पदार्थ, हुक्का पात्र, दहा मोबाइल संच, सुगंधी तंबाखू, दोन मोटारी, मद्याच्या बाटल्या असा मुद्देमाल जप्त केला होता. घटनास्थळावरून जप्त केलेले कोेकेन, गांजासदृश अंमली पदार्थ तपासणीसाठी पाठवून डाॅ. खेवलकरची वैद्यकीय तपासणी केली होती.याप्रकरणी अटक आरोपींच्या रक्ताचे नमुने न्याय वैद्यकीय प्रयोगशाळेत तपासणीसाठी पाठवण्यात आले होते. याबाबतचा अहवाल न्याय वैद्यकीय प्रयोगशाळेने नुकताच पुणे पोलिसांना दिला. या अहवालात डाॅ. खेवलकरने अंमली पदार्थांचे सेवन केले नसल्याचे म्हटले आहे. खराडी पार्टी प्रकरणात पोलिसांनी न्यायालयात आरोपपत्र दाखल केले. प्रयोगशाळेचा अहवाल आरोपपत्रासोबत आहे, अशी माहिती सूत्रांनी दिली. या अहवालामुळे डाॅ. खेवलकरला दिलासा मिळाला आहे. मात्र, पार्टीत अंमली पदार्थ कोणी पुरविले, यादृष्टीने पोलीस तपास करत आहेत. डाॅ. खेवलकरला २५ सप्टेंबर रोजी जामीन मंजूर झाला आहे.
