मुंबई : विधानसभा निडवणुकीत महायुतीने महाविकास आघाडीचा दारुण पराभव केला. यानंतर आगामी महापालिका निवडणुकीच्या पार्श्वभूमीवर उद्धव ठाकरे यांच्या शिवसेनेला गेल्या काही दिवसांपासून एका मागे एक धक्के बसताना दिसत आहेत. आता ठाकरेंच्या शिवसेनेच्या प्रवक्ता संजना घाडी आणि त्यांचे पती संजय घाडी यांनी एकनाथ शिंदे यांच्या शिवसेनेत प्रवेश केला आहे. आगामी महापालिका निवडणुकीच्या पार्श्वभूमीवर ठाकरेंचे शिवसेनेला शिंदे गटाने आणखी एक मोठे खिंडार पाडल्याचे पाहायला मिळत आहे. Sanjay Ghadi |

ठाकरे गटाचे माजी नगरसेवक संजय घाडी आणि उपनेत्या, प्रवक्त्या संजना घाडी यांच्यासह मागाठाणे विधानसभेतील अनेक उपशाखाप्रमुख, गटप्रमुख, शाखाध्यक्ष आणि युवा सेनेच्या शेकडो कार्यकर्त्यांनी रविवारी (दि. १४) उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला. माजी नगरसेवक राम रेपाळे यांनी घाडी दाम्पत्याचा शिवसेनेत – प्रवेश घडवून आणला. यावेळी विधान परिषद उपसभापती आणि शिवसेना नेत्या आमदार डॉ. नीलम गोऱ्हे उपस्थित होत्या. Sanjana Ghadi |

याबाबत बोलताना एकनाथ शिंदे म्हणाले, मागील अडीच पाच वर्षांत सर्वसामान्यांना सोन्याचे दिवस आणण्याचे काम महायुती सरकारच्या माध्यमातून केले आहे. एकीकडे विकास प्रकल्प आणि दुसरीकडे, लोकाभिमुख योजना या दोघांची सांगड घालण्याचा प्रयत्न सरकारने केला. त्यामुळे विधानसभा निवडणुकीत राज्यातील जनतेने महायुतीला ऐतिहासिक विजय मिळवून दिला. Uddhav Thackeray |

या निवडणुकीत ८० जागा लढवून ६० जागा जिंकलो, तर कोणी १०० जागा लढवून २० जागा जिंकल्या, यावरून खरी शिवसेना कोणाची यावर जनतेने शिक्कामोर्तब केले. त्यांच्या आरोपाला आरोपातून नाही तर कामातून उत्तर दिले. बाळासाहेब म्हणायचे, सत्ता येते, सत्ता जाते, पण नाव जाता कामा नये, ते नाव टिकवण्याचे काम आपण केले हे काम करणारे सरकार आहे. ही काम करणारी शिवसेना आहे. धनुष्यबाण ही आपली निशाणी आहे. धनुष्यबाण आणि भगवा झेंडा हे आपले इमान आहे, श्वास आहे आणि आपला अभिमान आहे, असे उपमुख्यमंत्री एकनाथ शिंदे यावेळी म्हणाले. Eknath Shinde |