मुंबई : बॉलिवूड किंग शाहरुख खानला काही दिवसांपूर्वी जीवे मारण्याची धमकी देण्यात आली होती. या प्रकरणी आता एक धक्कादायक माहिती समोर आली आहे. या प्रकरणी पोलिसांनी रायपूरमधून वकील फैजान खान याला अटक करण्यात आली होती. पोलिसांनी त्याची कसून चौकशी केल्यानंतर एक धक्कादायक माहिती समोर आली आहे.

काय झाला खुलासा ?
आरोपीच्या मोबाइल फोनच्या ब्राऊझिंग हिस्ट्रीमध्ये शाहरुखच्या सुरक्षेशी संबंधित आणि आर्यन खानविषयी तपशीलवार सर्च केल्याचं दिसलंय. मात्र ही माहिती त्याने का गोळा केली याचं समाधानकारक उत्तर आरोपी पोलिसांना देऊ शकला नाही, अशी माहिती वांद्रे पोलीस अधिकाऱ्यांनी दिली. पोलिसांनी दिलेल्या माहितीनुसार, आरोपीने जस्ट डायलवरून वांद्रे पोलीस ठाण्याचा लँडलाइन नंबर मिळवला आणि नंतर धमकीचा कॉल केला.

धमकीचा कॉल करण्यासाठी जो मोबाइल फोन वापरण्यात आला होता, तो 30 ऑक्टोबर रोजी म्हणजेच धमकीचा कॉल करण्याच्या एक आठवड्याआधीच खरेदी करण्यात आला होता, असे तपासादरम्यान स्पष्ट झालं. फैजान खानने स्वत: हा फोन विकत घेतला होता आणि त्यात त्याचे जुना सिम कार्ड टाकून तो फोन वापरत होता. तरीही त्याने 2 नोव्हेंबर रोजी फोन चोरीला गेल्याची तक्रार पोलिसांत दाखल केली होती.

त्याने फोनमधील सिम कार्ड डिॲक्टिव्हेट केले नव्हते. जर तो फोन खरंच चोरीला गेला असता तर चोराने फोनमधील सिम कार्ड बदलला असता. पण याप्रकरणी असं काहीच झालं नसल्याचं, पोलीस म्हणाले. इतकंच नव्हे तर आरोपीने त्या फोन नंबरवर कॉल करून माहिती मिळवण्याचा कोणताच प्रयत्न केला नव्हता.