Anand Paranjape : शिवसेनेच्या दसरा मेळाव्यापूर्वी उपमुख्यमंत्री आणि शिवसेनेचे मुख्य नेते एकनाथ शिंदे यांनी महत्त्वाचा संघटनात्मक निर्णय घेतला आहे. राष्ट्रवादी काँग्रेसच्या अजित पवार गटातून शिवसेनेत प्रवेश केलेले माजी खासदार आनंद परांजपे यांची पक्षाच्या प्रवक्तेपदी नियुक्ती करण्यात आली आहे. शिवसेनेकडून सोशल मीडियावर अधिकृत पत्रक प्रसिद्ध करून या नियुक्तीची माहिती देण्यात आली आहे.

एकनाथ शिंदेंच्या आदेशाने नियुक्ती

शिवसेनेने प्रसिद्ध केलेल्या पत्रकानुसार, हिंदुहृदयसम्राट शिवसेनाप्रमुख बाळासाहेब ठाकरे यांच्या आशीर्वादाने आणि शिवसेनेचे मुख्य नेते तथा उपमुख्यमंत्री एकनाथ शिंदे यांच्या आदेशानुसार आनंद परांजपे यांची पक्षाच्या प्रवक्तेपदी नियुक्ती करण्यात आली आहे.

वंदनीय हिंदुहृदयसम्राट शिवसेनाप्रमुख बाळासाहेब ठाकरे यांच्या आशीर्वादाने व शिवसेना मुख्य नेते आणि उपमुख्यमंत्री मा.ना.श्री. एकनाथजी शिंदे यांच्या आदेशानुसार माजी खासदार आणि शिवसेना राज्य संघटन प्रमुख मा. श्री. आनंद परांजपे यांची शिवसेना पक्षाच्या प्रवक्ते पदी नियुक्ती करण्यात येत आहे. त्यांना पुढील वाटचालीसाठी हार्दिक शुभेच्छा!

#Shivsena #EknathShinde #maharashtra
#Congratulations #नियुक्ती

— Shivsena – शिवसेना (@Shivsenaofc) October 20, 2026

आनंद परांजपे हे माजी खासदार असून, त्यांच्याकडे शिवसेनेच्या राज्य संघटनप्रमुखपदाचीही जबाबदारी आहे. आता प्रवक्तेपदाची अतिरिक्त जबाबदारी मिळाल्याने पक्षाची भूमिका आणि राजकीय मुद्दे मांडण्यात त्यांची महत्त्वाची भूमिका असणार आहे. शिवसेनेकडून त्यांना पुढील वाटचालीसाठी शुभेच्छाही देण्यात आल्या आहेत.

पक्षांतर्गत निवडणुकांपर्यंत नियुक्ती कायम?

शिवसेनेतील पक्षांतर्गत निवडणुका होईपर्यंत आनंद परांजपे यांची प्रवक्तेपदी नियुक्ती कायम राहणार असल्याची माहिती समोर आली आहे. दसरा मेळाव्याच्या पार्श्वभूमीवर झालेल्या या नियुक्तीमुळे पक्षाच्या संघटनात्मक पातळीवर कोणत्या नव्या घडामोडी घडतात, याकडे राजकीय निरीक्षकांचे लक्ष लागले आहे.

मुंबईत आज दोन दसरा मेळावे

दरम्यान, मुंबईत आज शिवसेनेचे दोन स्वतंत्र दसरा मेळावे आयोजित करण्यात आले आहेत. शिवसेना उद्धव बाळासाहेब ठाकरे पक्षाचा मेळावा उद्धव ठाकरे यांच्या नेतृत्वाखाली शिवाजी पार्क येथे होणार आहे. तर उपमुख्यमंत्री एकनाथ शिंदे यांच्या नेतृत्वाखालील शिवसेनेचा मेळावा नेस्को सेंटर येथे आयोजित करण्यात आला आहे. दोन्ही गटांकडून मेळाव्यांची जय्यत तयारी करण्यात आली आहे. शिवसेनेतील ६ खासदारांच्या फुटीनंतर राज्याच्या राजकारणात निर्माण झालेल्या परिस्थितीच्या पार्श्वभूमीवर या मेळाव्यांना विशेष महत्त्व प्राप्त झाले आहे.

उद्धव ठाकरे आणि एकनाथ शिंदे काय बोलणार?

उद्धव ठाकरे यांच्या नेतृत्वाखालील गटातील खासदारांबाबतच्या राजकीय घडामोडींनंतर होणाऱ्या या मेळाव्यांकडे विशेष लक्ष दिले जात आहे. दोन्ही नेते आपल्या भाषणातून कोणते राजकीय मुद्दे मांडतात, विरोधकांवर काय टीका करतात आणि आगामी राजकीय वाटचालीबाबत काय संकेत देतात, याबाबत उत्सुकता आहे.

Alia Bhatt: गुलाबी सिल्क साडी, निळा ब्लाऊज अन् गजरा! दुर्गापूजेत आलिया भट्टचा पारंपरिक लूक चर्चेत