चंदिगढ : आपची सत्ता असणाऱ्या पंजाबमध्ये गुरूवारी दोन महत्वाच्या घडामोडी घडल्या. त्यानुसार, कुलदीपसिंग धालीवाल यांना राज्य मंत्रिमंडळातून वगळण्यात आले. त्यांच्या जागी नवनिर्वाचित आमदार संजीव अरोरा यांना मंत्री बनवण्यात आले. पंजाबच्या लुधियाना पश्चिम विधानसभा मतदारसंघात नुकतीच पोटनिवडणूक झाली. त्यामध्ये आपचे उमेदवार अरोरा यांनी बाजी मारली. पोटनिवडणुकीच्या प्रचारावेळी आपने आमदार बनल्यास अरोरा यांना मंत्री बनवण्याचे आश्वासन दिले होते. ते पक्षाने पाळले. मात्र, अरोरा यांचा मंत्रिमंडळात समावेश करताना धालीवाल यांना डच्चू देण्यात आला. ती कृती चकित करणारी ठरली. धालीवाल यांच्याकडील अनिवासी भारतीय व्यवहार मंत्रालय अरोरा यांच्याकडे सोपवण्यात आले. त्याशिवाय, ते उद्योग आणि वाणिज्य खात्याची जबाबदारीही सांभाळतील. पंजाब मंत्रिमंडळात मुख्यमंत्र्यांसह एकूण १८ मंत्र्यांचा समावेश केला जाऊ शकतो. अरोरा यांच्या समावेशानंतरही २ मंत्रिपदे रिक्त आहेत. आमदार बनल्याने अरोरा यांनी खासदारकीचा राजीनामा दिला. त्यामुळे पंजाबमधून राज्यसभेवर निवडून द्यावयाची जागा रिक्त झाली. त्या जागेवर आप धालीवाल यांना की दुसऱ्यालाच संधी देणार याविषयी उत्सुकता निर्माण झाली आहे.
