Maharashtra Politics : राष्ट्रवादी काँग्रेसच्या दोन्ही गटांच्या संभाव्य विलिनीकरणाबाबत चर्चा सुरू असतानाच रायगडच्या राजकारणात नव्या घडामोडी घडण्याची शक्यता आहे. शिवसेनेचे मंत्री भरत गोगावले हे राष्ट्रवादी काँग्रेसच्या अजित पवार गटाला रायगडमध्ये धक्का देण्याच्या तयारीत असल्याची चर्चा आहे. राष्ट्रवादीतील काही पदाधिकारी आणि कार्यकर्ते सोमवारी रोहा येथे शिवसेनेत प्रवेश करणार असल्याची माहिती समोर आली आहे. (Maharashtra Politics)

चार प्रमुख नेत्यांच्या पक्षप्रवेशाची चर्चा

मंत्री भरत गोगावले यांच्या उपस्थितीत हा पक्षप्रवेश सोहळा होणार असल्याचे सांगितले जात आहे. यामध्ये श्रीवर्धन विधानसभा मतदारसंघातील राष्ट्रवादी काँग्रेसचे माजी तालुकाध्यक्ष दर्शन विचारे यांचा समावेश आहे. तब्बल १७ वर्षांनंतर ते पुन्हा शिवसेनेत घरवापसी करणार असल्याची माहिती आहे. (Maharashtra Politics)

त्यांच्यासोबत राष्ट्रवादीचे पदाधिकारी आणि कार्यकर्ते प्रमोद म्हसकर, सुरेश मगर आणि आप्पा देशमुख हेही शिवसेनेत प्रवेश करणार असल्याची चर्चा आहे. प्रमोद म्हसकर हे पेण विधानसभा मतदारसंघाचे कार्याध्यक्ष असून पंचायत समिती सदस्य असल्याचे सांगितले जाते. आप्पा देशमुख हे सक्रिय कार्यकर्ते म्हणून ओळखले जातात. (Maharashtra Politics)

तटकरे-गोगावले संघर्षाच्या पार्श्वभूमीवर महत्त्वाची घडामोड

शिवसेना शिंदे गट आणि राष्ट्रवादी काँग्रेसचा अजित पवार गट राज्यात सत्तेत एकत्र असले, तरी रायगड जिल्ह्यात स्थानिक पातळीवर दोन्ही पक्षांमध्ये राजकीय संघर्ष पाहायला मिळतो. मंत्री भरत गोगावले आणि राष्ट्रवादीचे प्रदेशाध्यक्ष सुनील तटकरे यांच्यातील राजकीय मतभेदांमुळे या संभाव्य पक्षप्रवेशाला विशेष महत्त्व प्राप्त झाले आहे. (Maharashtra Politics)

या पक्षप्रवेशामुळे रायगडमधील राष्ट्रवादी काँग्रेसच्या संघटनात्मक ताकदीवर परिणाम होणार का, तसेच शिवसेनेला स्थानिक पातळीवर किती फायदा होणार, याबाबत चर्चा सुरू झाली आहे. (Maharashtra Politics)

सोमवारी रोहा येथे होणाऱ्या संभाव्य पक्षप्रवेशाकडे संपूर्ण जिल्ह्याचे लक्ष लागले आहे. या घडामोडींनंतर रायगडमधील राजकीय समीकरणांमध्ये कोणते बदल होतात, हे पाहणे महत्त्वाचे ठरणार आहे. (Maharashtra Politics)

Maharashtra Politics : मोठा राजकीय भूकंप; राष्ट्रवादीच्या बड्या नेत्याची तडकाफडकी निवृत्ती?