कोयनानगर : पाटण तालुक्यातील भाजपला आज मोठा धक्का बसला. जिल्हा परिषदेचे माजी उपाध्यक्ष आणि पाटण तालुक्यातील प्रभावशाली नेते विक्रमबाबा पाटणकर यांनी भाजपचा निरोप घेत राष्ट्रवादी काँग्रेसमध्ये (अजित पवार) प्रवेश केला आहे. अजित पवार यांच्या उपस्थितीत मुंबईत झालेल्या कार्यक्रमात पाटणकरांनी राष्ट्रवादी काँग्रेसमध्ये प्रवेश केला. यावेळी मंत्री हसन मुश्रीफ, आमदार प्राजक्त तनपुरे, तसेच साताऱ्यातील राष्ट्रवादीचे पदाधिकारी उपस्थित होते. पाटणकर यांच्या प्रवेशाने पाटण तालुक्यातील राजकीय समीकरणे पूर्णपणे बदलणार आहेत. जिल्हा परिषद, पंचायत समिती आणि आगामी विधानसभा निवडणुकांच्या पार्श्वभूमीवर हा प्रवेश महत्त्वाचा मानला जात आहे. विक्रमबाबा पाटणकर तालुक्यातील जुन्या कार्यकर्त्यांपैकी असून, गेल्या काही वर्षांपासून ते भाजपच्या माध्यमातून स्थानिक राजकारणात सक्रिय होते. मात्र, मागील काही महिन्यांपासून पक्षातील अंतर्गत मतभेद आणि स्थानिक पातळीवरील निर्णयप्रक्रियेत दुर्लक्ष होत असल्याच्या कारणामुळे त्यांनी अखेर राष्ट्रवादीत जाण्याचा निर्णय घेतल्याचे बोलले जात आहे. पाटणकर यांच्या राष्ट्रवादीत प्रवेशामुळे अजित पवार गटाला पाटण तालुक्यात मजबूत आधार मिळेल, अशी चर्चा राजकीय वर्तुळात रंगली आहे. दुसरीकडे भाजपच्या स्थानिक नेत्यांत मात्र नाराजीचे वातावरण दिसून येत आहे.
