भोसरी – भोसरी एमआयडीसी परिसरातील विविध रस्त्यांची मोठ्या प्रमाणात दुरवस्था झाली असून, ठिकठिकाणी मोठमोठे खड्डे पडले आहेत. पावसामुळे या खड्ड्यांमध्ये पाणी साचत असल्याने त्यांची खोली लक्षात येत नाही. त्यामुळे वाहनचालकांसह पादचाऱ्यांना मोठ्या अडचणींचा सामना करावा लागत असून, अपघाताचा धोका वाढला आहे.

भोसरी एमआयडीसी परिसरात मोठ्या प्रमाणात औद्योगिक कंपन्या, कारखाने, गोदामे आणि व्यावसायिक आस्थापना आहेत. त्यामुळे या भागातील रस्त्यांवर दिवसभर मालवाहू ट्रक, कंटेनर, टेम्पो, चारचाकी आणि दुचाकी वाहनांची मोठी वर्दळ असते. मात्र, रस्त्यांची नियमित देखभाल आणि दुरुस्ती होत नसल्याने अनेक ठिकाणी रस्त्यांची अवस्था बिकट झाली आहे.

पावसाळ्यात परिस्थिती आणखी गंभीर झाली आहे. रस्त्यावरील खड्ड्यांमध्ये पाणी साचल्याने वाहनचालकांना अंदाज येत नसल्याने वाहने खड्ड्यात आदळण्याचे प्रकार घडत आहेत. विशेषतः दुचाकीस्वारांसाठी हे खड्डे धोकादायक ठरत असून, अचानक खड्डा समोर आल्याने वाहनाचा तोल जाण्याची शक्यता आहे.

खराब रस्त्यांमुळे वाहतुकीचा वेगही मंदावतो, खड्डे चुकविताना वाहनचालकांना अचानक वळावे लागत असल्याने वाहतुकीत अडथळे निर्माण होतात. तसेच सतत खड्ड्यांतून वाहने गेल्याने टायर, चाके आणि सस्पेन्शनचे नुकसान होऊन वाहनचालकांवर अतिरिक्त खर्चाचा भार पडत आहे.

एमआयडीसी परिसरातील रस्त्यांची तातडीने पाहणी करून खड्डे बुजविण्यासोबतच आवश्यक ठिकाणी दर्जेदार डांबरीकरण करावे. तसेच पावसाचे पाणी साचू नये यासाठी नाले व पाण्याच्या निचऱ्याची व्यवस्था तपासावी, अशी मागणी नागरिकांकडून होत आहे. रस्त्यांची नियमित देखभाल करून कायमस्वरूपी उपाययोजना करण्याची गरज आहे, अशी मागणी नागरिकांकडून होत आहे.

Pimpri-Chinchwad: पाणीपुरवठ्यासाठी २२० कोटींच्या कामांना मंजुरी; अंदाजपत्रक समितीची मान्यता