Bhor Kapurhol Road – भोर-कापूरव्होळ मार्गावरील भोलावडे (ता. भोर) ग्रामपंचायत हद्दीतील बुवासाहेबवाडी परिसरात सध्या टेकडी फोडून ‘निसर्ग नगरी’ नावाने प्लॉटिंगचे काम सुरू आहे. मुख्य रस्त्यावरून या ठिकाणी जाण्यासाठी सिमेंट-काँक्रिटच्या रस्त्याचे बांधकाम प्रगतीपथावर आहे. मात्र, टेकडी फोडल्यामुळे पावसाच्या पाण्यासोबत मुख्य रस्त्यावर मोठ्या प्रमाणावर माती व मुरुम वाहून येत असल्याने रस्ता अत्यंत निसरडा बनला आहे.

यामुळे या मार्गावरून जाणाऱ्या वाहनचालकांना मोठी कसरत करावी लागत आहे. या परिसरात तीव्र उतार आणि धोकादायक वळण असल्याने वाहनांवर नियंत्रण राखणे अवघड जात असून, लहान-मोठे अपघात घडत आहेत. संबंधित बांधकाम व्यावसायिकाच्या डंपर, सिमेंट मिक्सर, जेसीबी आणि पोकलेन यांसारख्या अवजड वाहनांमधून सिमेंट व मातीचा कचरा रस्त्यावर पडत आहे. पावसामुळे त्याचा चिखल होऊन दुचाकीस्वार घसरून पडत आहेत, तर चारचाकी वाहने अनियंत्रित होत आहेत.

बांधकाम नियमांचे उल्लंघन
बांधकाम नियमांनुसार बांधकाम स्थळावरून बाहेर पडणाऱ्या वाहनांची चाके धुवूनच त्यांना मुख्य रस्त्यावर सोडणे बंधनकारक आहे. मात्र, संबंधित व्यावसायिक या नियमांचे खुलेआम उल्लंघन करत असल्याचे दिसून येत आहे. या बेजबाबदार कारभारामुळे निष्पाप प्रवाशांचा जीव धोक्यात आला असून, प्रशासनाने तत्काळ संबंधित व्यावसायिकावर योग्य ती कारवाई करावी आणि रस्ता पूर्ववत साफ करून द्यावा, अशी तीव्र मागणी स्थानिक नागरिकांनी व वाहनचालकांनी केली आहे.