Bhimashankar – जिल्हाधिकारी जितेंद्र डुड्डी यांनी श्री क्षेत्र भीमाशंकर मंदिरात विधिवत शासकीय पूजा करून ज्योतिर्लिंगाचे दर्शन घेतले. येत्या काळात परिसरातील नागरिकांचे आर्थिक सक्षमीकरण करण्याच्यादृष्टीने येत्या काळात ‘भीमाशंकर महोत्सव’ आयोजन करण्याचा मानस त्यांनी व्यक्त केला. शासकीय पूजा करते वेळी गणेशनाथ महाराज,उपविभागीय अधिकारी अनिल दौडे, मंचर-जुन्नर विभागाचे उपविभागीय अधिकारी गोविंद शिंदे, तहसीलदार डॉ. सचिन वाघ,उपविभागीय पोलीस अधिकारी गजानन टोपे,घोडेगाव पोलीस ठाण्याचे सहायक पोलीस निरीक्षक सागर पवार,भीमाशंकर देवस्थानचे अध्यक्ष सुरेश कौदरे, सार्वजनिक बांधकाम विभागाचे उपअभियंता एस.जे.कुंभार यांच्यासह भाविक-भक्त,मंदिर समितीचे पदाधिकारी, स्थानिक प्रशासनातील अधिकारी व कर्मचारी उपस्थित होते. जिल्हाधिकारी जितेंद्र डुड्डी म्हणाले, देशातील १२ ज्योतिर्लिंगापैकी एक असलेल्या भीमाशंकर मंदिराच्या दर्शनासाठी मोठ्याप्रमाणात भाविक येत असतात. आगामी काळात नाशिक येथे कुंभमेळा होणार असून त्याचा विचार करता मंदिराच्या विकासासोबतच परिसरातील रस्ते,पाणी पुरवठा, सांडपाणी शुद्धीकरण प्रकल्प ‘एसटीपी’ ची कामे करण्यात येत असून ती लवकरच पूर्ण होतील, अशा विश्वास त्यांनी व्यक्त केला.ते पुढे म्हणाले, मंदिर परिसरातील विकासकामाकरिता ९ जानेवारी ते ९ एप्रिल २०२६ या कालावधीत भविकांची सुरक्षितता विचारात घेता मंदिर बंद ठेवण्यात आले आहे, कामाची पाहणी केली असता दर्जेदार पद्धतीने विकासकामे होत असून ९ एप्रिलपर्यंत मुख्य मंदिराचे काम पूर्ण होईल व त्यानंतर मंदिर भाविकांना दर्शनासाठी खुले करण्यात येणार आहे, जरी मंदिर बंद असले तरी श्री भीमाशंकराची दैनंदिन नियमित पूजा होत आहे, त्यामुळे भाविकांनी सहकार्य करावे,असे आवाहन डुड्डी यांनी केले.
