Bhangar Blast Case : पश्चिम बंगालमधील विधानसभा निवडणुकीपूर्वी भांगर येथे झालेल्या भीषण बॉम्बस्फोटाच्या (Bhangar Blast Case) तपासासाठी राष्ट्रीय तपास यंत्रणेने गुरुवारी माजी टीएमसी आमदार शौकत मोल्ला यांच्या निवासस्थानाची झडती घेतली.

केंद्रीय सशस्त्र पोलीस दलाच्या जवानांसह एनआयएचे एक मोठे पथक सकाळीच दक्षिण २४ परगणा जिल्ह्यातील भांगर (Bhangar Blast Case) येथील मोल्ला यांच्या मौखाली निवासस्थानी दाखल झाले. सुमारे १० वाहनांच्या ताफ्यासह आलेल्या अधिकाऱ्यांनी मोल्ला यांच्या कार्यालयाचीही कसून झडती घेतली.

छाप्यादरम्यान कॅनिंग पूर्बा मतदारसंघाचे माजी आमदार शौकत मोल्ला घरी उपस्थित नव्हते. त्यामुळे तपास अधिकाऱ्यांनी त्यांचे पुत्र इम्रान मोल्ला यांना घटनास्थळी बोलावून त्यांच्या उपस्थितीत कारवाई सुरू ठेवली.

१९ मार्च रोजी दक्षिण बामुनिया गावात एका घरात बेकायदेशीरपणे कच्चा बॉम्ब तयार करत असताना मोठा स्फोट झाला होता. या स्फोटात एका व्यक्तीचा मृत्यू झाला होता, तर तीन जण गंभीर जखमी झाले होते. या घटनेनंतर ‘इंडियन सेक्युलर फ्रंट’ने या प्रकरणाचा तपास एनआयएकडे देण्याची मागणी केली होती.

एनआयएने यापूर्वीच या प्रकरणाचा तपास हाती घेत टीएमसी नेते वाहिदुल इस्लाम यांच्यासह अनेकांना अटक केली आहे. चालू तपासाशी संबंधित पुरावे गोळा करणे आणि माहितीची सत्यता पडताळून पाहणे हाच या छाप्याचा मुख्य उद्देश असल्याचे अधिकाऱ्यांनी सांगितले.

सुरक्षेच्या कारणास्तव या भागात स्थानिक पोलिसांचा मोठा बंदोबस्त तैनात (Bhangar Blast Case) करण्यात आला होता. विशेष म्हणजे, २०१६ व २०२१ चे आमदार राहिलेल्या मोल्ला यांची सुरक्षा व्यवस्था राज्य सरकारने अलीकडेच काढून घेतली आहे.