Satara: ‘लाडकी बहीण’ योजनेतील पात्र महिलांनी ई-केवायसी करुनही हप्ता न मिळाल्याने, सरकारविरुद्ध नाराजीचा सूर उमटत आहेत. यात काही महिला अपात्रत ठरवण्यात आल्याने लाभार्थ्यांमध्ये संभ्रम आहे. सरकार पुन्हा ई-केवायसी करत असल्याच्या बातम्या प्रसारित होत असल्या, तरी असा कोणताही आदेश सरकारने दिला नसल्याचे महिला व बालविकास अधिकारी शिल्पा पाटील यांनी स्पष्ट केले.

‘लाडकी बहीण’ योजनेसाठी सरकारने लाभार्थी महिलांना ई-केवायसी करण्याचे आदेश दिले. त्यानुसार महिलांनी ई-केवायसी केली. यामध्ये अनेक महिला अपात्र झाल्या आहे. त्यानंतर पात्र महिलांना हप्ते मिळणार असल्याची माहिती देण्यात आली; परंतु पात्र महिलांना गेल्या तीन महिन्यांपासून हप्ते मिळालेले नाहीत. आणखी काही महिला अपात्र ठरल्या आहेत. त्यामुळे लाभार्थी महिलांमध्ये संभ्रम आहे.

अनेक महिलांनी केवायसी करुनही, त्यांना हप्ता मिळालेला नाही. त्यामुळे आपण अपात्र ठरलो आहोत, अशी भीती त्यांना वाटत आहे. ई-केवायसी पुन्हा सुरू होणार असल्याच्या बातम्या प्रसारित होत असल्याने, लाभार्थी महिला व बालविकास विभागाच्या कार्यालयात गर्दी करत आहेत. मात्र, सरकारकडून अद्याप परिपत्रक आले नसल्याचे शिल्पा पाटील यांनी सांगितले.