गेल्या पाच वर्षांत बीसीसीआयने 14,627 कोटी रुपयांची कमाई केली आहे, तर गेल्या वर्षी एकट्या 2024 मध्ये 4,193 कोटी रुपयांची कमाई झाली आहे. येत्या 28 सप्टेंबर रोजी मुंबईत होणाऱ्या वार्षिक सर्वसाधारण सभेत (एजीएम) अद्ययावत वित्तीय अहवाल सादर केला जाईल.

सामान्य निधीत दुप्पट वाढ –

क्रिकबजच्या अहवालानुसार, सर्व राज्य क्रिकेट संघटनांना त्यांचा हिस्सा दिल्यानंतरही बीसीसीआयच्या सामान्य निधीत मोठी वाढ झाली आहे. 2019 मध्ये हा निधी 3,906 कोटी रुपये होता, तो 2024 मध्ये दुप्पट होऊन 7,988 कोटी रुपये झाला आहे. यावरून बीसीसीआयची मजबूत आर्थिक स्थिती दिसून येते.

हेही वाचा – Duleep Trophy 2025 : महाराष्ट्राच्या सौरभ नवलेने रचला इतिहास, ‘ही’ कामगिरी करणारा ठरला पहिलाच खेळाडू

3,150 कोटींचा कर भरणा –

बीसीसीआय टॅक्स देत नाही, ही समजूत चुकीची ठरली आहे. बोर्डाने 3,150 कोटी रुपयांहून अधिक कर भरला आहे. सर्व राज्य संघटनांना हिस्सा वाटल्यानंतरही बीसीसीआयकडे मोठी रक्कम शिल्लक आहे, ज्यामुळे त्याची आर्थिक ताकद अधोरेखित होते.

मीडिया हक्कांमधील कमाईत घट –

गेल्या वर्षी आंतरराष्ट्रीय सामन्यांमधील मीडिया हक्कांमधून मिळणारी कमाई 2,525 कोटींवरून 813 कोटी रुपयांपर्यंत घसरली. याचे कारण, 2023 मध्ये भारतात कमी आंतरराष्ट्रीय सामने झाले, कारण ऑक्टोबर-नोव्हेंबर 2023 मध्ये बीसीसीआयने एकदिवसीय विश्वचषकाचे आयोजन केले होते. 2023-24 च्या ऑडिट अहवालानुसार, आंतरराष्ट्रीय पुरुष क्रिकेट दौरे आणि इव्हेंट्समधून मिळणारी कमाई 642.78 कोटींवरून 361.22 कोटी रुपयांपर्यंत कमी झाली आहे.

बँक ठेवींवरील व्याजातून 986 कोटींची कमाई –

बीसीसीआयला बँक ठेवींवरील व्याजातून मोठी कमाई झाली आहे. यंदा बँक ठेवींवर 986.45 कोटी रुपये व्याज मिळाले, तर मागील वर्षी हे 533.05 कोटी रुपये होते. जय शाह यांच्या मार्गदर्शनाखाली बीसीसीआयने राष्ट्रीयकृत आणि खासगी बँकांमधून कमी जोखमीवर उत्तम परतावा मिळवला आहे.

हेही वाचा – Duleep Trophy 2025 : रजत पाटीदारचा जलवा! आरसीबीनंतर आता सेंट्रल झोनला नेलं फायनलमध्ये

आयपीएल 2023 मुळे मोठा नफा –

यंदा बीसीसीआयला एकूण उत्पन्न आणि खर्चात 1,623.08 कोटी रुपयांचा नफा (सरप्लस) झाला, जो मागील वर्षी 1,167.99 कोटी रुपये होता. ही वाढ प्रामुख्याने आयपीएल 2023 च्या कमाईमुळे आणि आयसीसीकडून मिळालेल्या रकमेमुळे झाली आहे. याशिवाय, बीसीसीआयने भविष्यासाठी अनेक महत्त्वाचे निधीही स्थापन केले आहेत. बीसीसीआयची ही आर्थिक प्रगती क्रिकेटच्या विकासासाठी आणि भारतीय क्रिकेटच्या जागतिक वर्चस्वासाठी सकारात्मक संदेश देते.