Maharashtra Politics : बारामतीत पुन्हा एकदा ‘पवार विरुद्ध पवार’ सामना रंगण्याची शक्यता निर्माण झाली आहे. सोमेश्वर सहकारी साखर कारखान्याच्या निवडणुकीत सुनेत्रा पवार यांच्या मार्गदर्शनाखालील पॅनलसमोर युगेंद्र पवार स्वतंत्र पॅनलच्या माध्यमातून आव्हान उभे करणार असल्याची माहिती समोर आली आहे. युगेंद्र पवार यांनी स्वतंत्र पॅनल उभे करण्याची घोषणा केल्याने कारखान्याच्या निवडणुकीकडे आता सर्वांचे लक्ष लागले आहे. (Maharashtra Politics)

सोमेश्वर कारखान्याच्या निवडणुकीत चुरस वाढणार

यापूर्वी सुनेत्रा पवार यांनी भाऊकी-गावकीचे गट-तट बाजूला ठेवून एकजुटीने पुढे जाण्याचे आवाहन केले होते. मात्र आता युगेंद्र पवार यांनी स्वतंत्र पॅनलच्या माध्यमातून निवडणुकीच्या मैदानात उतरण्याची भूमिका घेतली आहे. ते लवकरच इच्छुक उमेदवारांच्या मुलाखती सुरू करणार असल्याची माहिती आहे.

युगेंद्र पवार यांच्या स्वतंत्र पॅनलमुळे सोमेश्वर सहकारी साखर कारखान्याच्या निवडणुकीत चुरस वाढण्याची शक्यता आहे. शेतकरी सभासदांच्या प्रश्नांना प्राधान्य देत सक्षम पर्याय उभा करण्याच्या उद्देशाने निवडणूक लढवत असल्याचे युगेंद्र पवार यांनी स्पष्ट केले आहे. (Maharashtra Politics)

‘पवार विरुद्ध पवार’ करण्यात रस नाही : युगेंद्र पवार

युगेंद्र पवार यांनी आपल्या भूमिकेबाबत स्पष्टपणे सांगितले की, ‘पवार विरुद्ध पवार’ असा सामना करण्यात आम्हाला रस नाही. कुणाच्या विरोधात लढण्यापेक्षा शेतकरी सभासदांसाठी सक्षम पर्याय उभा राहणे गरजेचे आहे, अशी भूमिका त्यांनी मांडली. (Maharashtra Politics)

सुनेत्रा पवार यांच्याबद्दल आपला कोणताही आक्षेप नसल्याचे सांगतानाच, सोमेश्वर कारखान्याच्या विद्यमान संचालकांबाबत मात्र आक्षेप असल्याचे त्यांनी नमूद केले. यंदा बदल गरजेचा आहे, असेही युगेंद्र पवार यांनी म्हटले आहे. त्यामुळे युगेंद्र पवार यांच्या या भूमिकेनंतर सोमेश्वर कारखान्याची निवडणूक अधिक रंगतदार होण्याची चिन्हे आहेत. (Maharashtra Politics)

बारामतीत याआधीही पाहायला मिळाला ‘पवार विरुद्ध पवार’ सामना

बारामतीच्या राजकारणात पवार कुटुंबातील आमनेसामने लढती याआधीही पाहायला मिळाल्या आहेत. लोकसभा निवडणुकीत सुनेत्रा पवार आणि सुप्रिया सुळे यांच्यात थेट लढत झाली होती. या निवडणुकीत सुप्रिया सुळे यांनी विजय मिळवत बारामतीची जागा कायम राखली. (Maharashtra Politics)

त्यानंतर विधानसभा निवडणुकीतही बारामतीत पवार कुटुंबातील दोन पिढ्यांमध्ये राजकीय सामना पाहायला मिळाला. अजित पवार यांच्याविरोधात युगेंद्र पवार निवडणुकीच्या मैदानात उतरले होते. या लढतीत अजित पवार यांनी मोठा विजय मिळवला होता. (Maharashtra Politics)

आता सोमेश्वर सहकारी साखर कारखान्याच्या निवडणुकीत सुनेत्रा पवार आणि युगेंद्र पवार यांचे गट आमनेसामने येण्याची शक्यता असल्याने बारामतीच्या राजकारणात पुन्हा एकदा ‘पवार विरुद्ध पवार’ची चर्चा रंगली आहे. (Maharashtra Politics)

Maharashtra Politics : मोठी बातमी..! ठाकरेसेनेच्या विशाखा राऊत यांचे नगरसेवकपद रद्द; महापौर रितू तावडेंची घोषणा

Maharashtra Politics : कष्टकरी बहिणींच्या डोक्यावर हक्काचे छप्पर; स्वतःचे घर मिळवून देण्याचा आमदार सत्यजीत तांबेंचा निर्धार