Baramati News – गेटझनर इंडिया प्रा. लि.च्या उत्पादन प्रकल्पामुळे राज्याच्या औद्योगिक धोरणावर आणि गुंतवणूकस्नेही वातावरणावर जागतिक स्तरावरील विश्वास अधिक बळकट होत असल्याचे दिसून येते. या प्रकल्पामुळे स्थानिक तरुणांना रोजगाराच्या संधी उपलब्ध होणार असून उद्योजकांनाही नवे संधी मिळतील. त्यामुळे बारामतीच्या औद्योगिक विकासाला निश्चितच गती मिळेल, असा विश्वास उपमुख्यमंत्री सुनेत्रा अजित पवार यांनी व्यक्त केला. महाराष्ट्र औद्योगिक विकास महामंडळाच्या परिसरात गेटझनर इंडियाच्या उत्पादन प्रकल्पाच्या उद्घाटनप्रसंगी त्या बोलत होत्या. यावेळी ऑस्ट्रियाचे राजदूत रॉबर्ट झीग, एमआयडीसीचे प्रादेशिक अधिकारी हनुमंत पाटील, नगराध्यक्ष सचिन सातव, एममायडीचे कार्यकारी अभियंता विजय पेठकर, बारामती औद्योगिक वसाहत संघटनेचे अध्यक्ष धनंजय जामदार, गेटझनर ऑस्ट्रियाचे मुख्य कार्यकारी अधिकारी युर्गेन राईनआल्टर, माजी अतिरिक्त मुख्य सचिव डॉ. उज्वल उके, इबीजी फेडरेशनचे चेअरमन रमणसिंग सिधू, गेटझनरचे निवासी संचालक संजय रिसबुड उपस्थित होते. पवार म्हणाल्या की, प्रकल्पामध्ये अद्ययावत पीयू मोल्डिंग, दुय्यम प्रक्रिया सुविधा उपलब्ध आहेत. उत्पादित होणारी उत्पादने विशेषतः मेट्रो प्रकल्पांसाठी वापरण्यात येणार आहेत. ही उत्पादने आयात पर्यायी असल्याने परकीय चलनाचीही बचत होणार आहे. येथून दर्जेदार आणि गुणवत्तापूर्ण उत्पादने विकसित होतील, अशी अपेक्षा त्यांनी व्यक्त केली. बारामती ही कृषी व आरोग्य क्षेत्रासाठी ओळखली जाणारी भूमी असली, तरी आता ती आधुनिक उद्योगनगरी म्हणूनही उदयास येत आहे. परिणामी राज्याच्या आर्थिक विकासालाही गती मिळेल. उद्योगांचा विकास होत असताना पर्यावरणाचा ऱ्हास होणार नाही, याची विशेष दक्षता घेण्याची गरज त्यांनी अधोरेखित केली. यावेळी प्रकल्प उभारणीच्या कार्यात योगदान दिल्याबद्दल नगरपरिषदेचे अध्यक्ष सचिन सातव आणि एमआयडीसीचे प्रादेशिक अधिकारी हनुमंत पाटील यांचा सन्मान करण्यात आला. परकीय गुंतवणूकदार उत्सुक ऑस्ट्रियाचे राजदूत रॉबर्ट झीग म्हणाले की, भारतामध्ये उद्योगस्नेही व गुंतवणूकपूरक वातावरण उपलब्ध असल्यामुळे अधिकाधिक परकीय गुंतवणूकदार येथे प्रकल्प उभारण्यास उत्सुक आहेत. या प्रकल्पाच्या माध्यमातून दर्जेदार उत्पादनाबरोबरच स्थानिकांना रोजगार देण्याला प्राधान्य दिले जाईल, असे त्यांनी सांगितले. यावेळी उपमुख्यमंत्री पवार यांनी प्रकल्पाची पाहणी करुन उत्पादनाबाबत माहिती घेतली.
