Baramati IPO Fraud – आयपीओ गुंतवणुकीच्या नावाखाली १ कोटी ३० लाख रुपयांची सायबर फसवणूक झाल्याचा प्रकार बारामतीत उघडकीस आला आहे. या प्रकरणात बारामती शहर पोलिसांनी तत्काळ कारवाई करीत विविध बँक खात्यातील सुमारे ४४ लाख रुपये फ्रीज करण्यात यश मिळवले आहे. दुसरीकडे या प्रकरणी दोन संशयितांना अटक केली असून त्यांच्याकडून या फसवणूक प्रकरणातील सूत्रधारांचा शोध घेतला जात असल्याची माहिती पोलीस निरीक्षक श्रीशैल चिवडशेट्टी यांनी दिली. फिर्यादीला “F24 Indian Stock Market Investors Discussion Group” या WhatsApp ग्रुपमध्ये सहभागी करून घेण्यात आले होते. या ग्रुपमधील व्यक्तींनी शेअर मार्केट, आयपीओ आणि ट्रेडिंगमध्ये मोठा नफा मिळवून देण्याचे आमिष दाखवून फिर्यादीचा विश्वास संपादन केला. त्यानंतर फिर्यादीला FARLEYLLC नावाचे ॲप डाउनलोड करून खाते उघडण्यास सांगण्यात आले. ॲपवर खोटा नफा आणि वाढती रक्कम दाखवून वारंवार अधिक पैसे गुंतवण्यास भाग पाडले. विश्वास बसल्याने फिर्यादीने वेगवेगळ्या तारखांना विविध बँक खात्यांमध्ये मोठ्या रकमा जमा केल्या. आतापर्यंत १ कोटी ३० लाख रुपये यात गुंतवल्याचे समोर आले आहे. तपासात ही रक्कम प्रथम काही मध्यस्थ खात्यांमध्ये जमा करून नंतर विविध खात्यांमध्ये वळवल्याचे आढळले आहे. काही रक्कम एटीएमधून काढण्यात आली असून काही रक्कम विविध माध्यमातून रोख मिळवली असून हा प्रकार नियोजनबद्ध सायबर फसवणूक रॅकेटमार्फत घडवून आणल्याचे स्पष्ट झाले आहे. या प्रकरणात पोलिसांनी दोन संशयित आरोपींना अटक केली असून त्यांच्याकडून चौकशी सुरू आहे. पोलिसांनी विविध बँक खात्यातील ४४ लाख रुपये फ्रीज करण्यात यश मिळवले आहे. सहायक पोलीस उपनिरीक्षक संदीप जाधव, हवालदार सुलतान डांगे, यशवंत पवार, रामचंद्र शिंदे, सागर जामदार, अक्षय सिताफ, सूरज घाटे, विशाल शिंदे, गिरीश नेवसे यांच्या पथकाने ही कारवाई केली आहे.
