Baramati Crime – बारामती-भिगवण रोडवरील ‘प्रणव लॉज’वर बारामती तालुका पोलिसांनी गुरुवारी (दि. ५) सायंकाळी मोठी कारवाई केली. या छाप्यात देहव्यापार करणाऱ्या पाच आरोपींना अटक करण्यात आली असून, आसाम आणि पश्चिम बंगालमधील चार तरुणींची सुटका करण्यात आली आहे. या प्रकरणी एकूण सहा जणांविरुद्ध गुन्हा दाखल करण्यात आला आहे. आरोपींनी परराज्यातील गरीब महिलांना पैशांचे आमिष दाखवून त्यांना बारामतीत आणले होते. त्यांच्याकडून सक्तीने देहव्यापार करून घेऊन, त्यातून मिळणाऱ्या उत्पन्नावर हे आरोपी आपली उपजीविका चालवत असल्याचे पोलीस तपासात निष्पन्न झाले आहे. या कारवाईत आसाममधील तीन (वय २१, २६ आणि ३० वर्षे) आणि पश्चिम बंगालमधील एक (वय २२ वर्षे) अशा चार तरुणींची सुटका करण्यात आली. आरोपी सोमनाथ महादेव खोमणे (रा.सावळ, ता. बारामती), धिरज रामभाऊ जाधव (रा. जालना), सागर संजय सोडबुके (रा. बारामती), मेराजुल जानीफ अली (रा.गोलपारा,आसाम), अफजल मझीबर रहमान हुसेन (रा.बरपेटा, आसाम) आणि सदाम जुमरुद्दीन हुसेन (रा.बरपेटा,आसाम) यांच्याविरुद्ध गुन्हा दाखल करण्यात आला आहे. या प्रकरणी पोलीस उपनिरीक्षक धनश्री भगत यांनी फिर्याद दिली असून, आरोपींविरुद्ध भारतीय न्याय संहिता कलम १४३ आणि अनैतिक व्यापार प्रतिबंध अधिनियम (PITA) अंतर्गत गुन्हा नोंदवण्यात आला आहे. पोलीस अधीक्षक संदीपसिंह गिल, अपर पोलीस अधीक्षक गणेश बिरादार आणि उपविभागीय पोलीस अधिकारी सुदर्शन राठोड यांच्या मार्गदर्शनाखाली पोलीस निरीक्षक चंद्रशेखर यादव, उपनिरीक्षक युवराज पाटील, धनश्री भगत आणि पोलिस अंमलदार नितीन ढवाण, भारत खारतोडे, दादा दराडे, नीलेश वाकळे, सोनाली सूर्यवंशी, स्मिता गायकवाड, चालक आफरीन शेख, विठ्ठल तरंगे यांनी ही कारवाई केली. पोलीस निरीक्षक चंद्रशेखर यादव या प्रकरणाचा पुढील तपास करत आहेत.
