Baramati Crime – बारामती शहर पोलिसांची कारवाई करत रिंगरोडवर गांजा विक्री करणारा आरोपी रंगेहाथ जेरबंद केला. या कारवाईत १किलो ९८९ मिलीग्रॅम गांजा व मोटारसायकल जप्त करण्यात आली. अंमली पदार्थ विरोधी विशेष मोहिमेअंतर्गत बारामती शहर पोलीस स्टेशनने तत्परता दाखवत गांजा विक्री करणाऱ्या आरोपीस रंगेहाथ पकडले.दि २७ जानेवारी रोजी बारामती शहर पोलीस स्टेशन हद्दीत बोके हॉस्पिटलजवळील नवीन रिंग रोड परिसरात, एक इसम गांजा विक्रीसाठी येणार असल्याची अचूक व विश्वासार्ह गोपनीय माहिती पोलीस उपनिरीक्षक रत्नदिप भंडारे यांना प्राप्त झाली. ही माहिती तात्काळ वरिष्ठ अधिकाऱ्यांना कळविण्यात आली. पोलीस अधीक्षक संदीप सिंह गिल, अप्पर पोलीस अधीक्षक गणेश बिरादार, उपविभागीय पोलीस अधिकारी सुदर्शन राठोड व पोलीस निरीक्षक श्रीशैल चिवडशेट्टी यांच्या मार्गदर्शनाखाली ही कारवाई करण्यात आली. वरिष्ठ अधिकाऱ्यांच्या आदेशानुसार पोलीस उपनिरीक्षक रत्नदिप भंडारे यांच्या नेतृत्वाखाली विशेष पथक तयार करण्यात आले.या कारवाईत सहभागी पोलीस अधिकारी व कर्मचारी पो.हवा. सुलतान डांगे, पो.हवा. रामचंद्र शिंदे, पो.कॉ. वैभव मदने, पो.कॉ. राहुल बडे, पो.कॉ. गिरीश नेवसे, पो.कॉ. सागर जामदार, पो.कॉ. अक्षय सीताप यांच्या पथकाने अत्यंत गोपनीयतेने सापळा रचला. रात्रीच्या सुमारास आरोपी मोटारसायकलवर येताना दिसताच पोलिसांनी तत्काळ हालचाल करून त्यास पळून जाण्याची संधी न देता रिंग रोडवरच रंगेहाथ पकडले. चौकशीअंती आरोपीचे नाव फरहान युसुफ शेख, (वय २३ वर्षे, रा. खेड, ता. कर्जत, जि. अहिल्यानगर )असे निष्पन्न झाले. त्याच्याकडून १ किलो ९८९ ग्रॅम वजनाचा गांजा, अंदाजे किंमत रुपये ३९ हजार ७८० तसेच हिरो होंडा स्प्लेंडर मोटारसायकल (एम एच १६ डी डी ६३७४) अंदाजे किंमत रुपये ५० हजार असा मुद्देमाल एन डी पी एस मधील सर्व कायदेशीर तरतुदींचे काटेकोर पालन करून पंचांसमक्ष जप्त करण्यात आला आहे. या प्रकरणी आरोपीविरुद्ध गुन्हा दाखल करण्यात आला असून पुढील तपास बारामती शहर पोलीस स्टेशनमार्फत सुरू आहे.तरुण पिढीचे भविष्य सुरक्षित ठेवण्यासाठी पोलीस व नागरिक यांचे सहकार्य अत्यावश्यक आहे. बारामती शहर पोलीस स्टेशन अंमली पदार्थांवर झिरो टॉलरन्स धोरण अवलंबत असून, अशा कठोर कारवाया पुढेही सातत्याने सुरू राहतील, असे पोलीस प्रशासनाने स्पष्ट केले आहे.
