नवीन दर आजपासून : एमसीएलआरमध्ये 0.45 टक्‍क्‍यांपर्यंत कपात

पुणे – देशाच्या सार्वजनिक क्षेत्रातील एक अग्रणी असलेल्या बॅंक ऑफ महाराष्ट्रने विविध कालावधीतील आपले बेंचमार्क व्याजदर अर्थात्‌ “एमसीएलआर’ कमी केले आहेत. दि. 7 जानेवारीपासून लागू असणारे विविध कालावधीतील कर्जाचे व्याजदर अर्थात “एमसीएलआर’ सध्याच्या व्याजदरापेक्षा 0.45 टक्‍क्‍यांपर्यंत कमी केले आहेत.

बॅंकेचा ओव्हरनाईट, एक महिना आणि तीन महिन्यांचा व्याजदर 0.45 टक्‍क्‍याने कमी केले असून हे व्याजदर अनुक्रमे 7.60 टक्‍के (पूर्वीचा 8.05 टक्‍के), 7.70 टक्‍के (पूर्वीचा 8.15 टक्‍के) आणि 7.75 टक्‍के (पूर्वीचा 8.20 टक्‍के) असे आता निश्‍चित केले आहेत.

तर, सहा महिन्यांचा 0.40 टक्‍क्‍याने कमी झालेला व्याजदर 7.90 टक्‍के (पूर्वीचा 8.30 टक्‍के) आणि एक वर्षासाठी 0.15 टक्‍क्‍याने कमी झालेला व्याजदर आता 8.25 टक्‍के (पूर्वीचा 8.40 टक्‍के) इतका झालेला आहे.

कर्जव्याजदरांमध्ये घट करण्यामागचे बॅंकेचे लक्ष आर्थिक वृद्धीला आणि औद्योगिक विकासाला सहकार्य करणे आणि दरांच्या ट्रान्समिशनला निश्‍चित करणे असे आहे. बेस (आधार) व्याजदरामध्येदेखील बॅंकेने 0.10 टक्‍क्‍याने घट केली असल्याने बॅंक ऑफ महाराष्ट्रचा बेस व्याजदर आता 9.40 टक्‍के इतका झालेला आहे, असे बॅंकेने सांगितले आहे.