Bangladesh Election। बांगलादेशमध्ये पुढील वर्षी एप्रिलपर्यंत संसदीय निवडणुका घेण्याच्या सरकारच्या घोषणेला देशातील दोन प्रमुख पक्षांनी विरोध केला आहे. गेल्या वर्षी ऑगस्टमध्ये झालेल्या कथित क्रांतीनंतर सत्तेतून हाकलून लावण्यात आलेल्या शेख हसीना यांच्या पक्ष अवामी लीगने या निवडणूक योजनेला विरोध केला आहे. बांगलादेशच्या माजी पंतप्रधान आणि शेख हसीना यांच्या कट्टर प्रतिस्पर्धी खालिदा झिया यांच्या पक्ष बीएनपीनेही एप्रिलपर्यंत निवडणुका पुढे ढकलण्यास विरोध केला आहे. खालिदा झिया यांचा पक्ष बीएनपी उघडपणे मुहम्मद युनूसच्या विरोधात उभा राहिला आहे. एप्रिल २०२६ मध्ये देशात सार्वत्रिक निवडणुका घेण्यास बीएनपी उघडपणे विरोध करत आहे. बीएनपी स्थायी समितीचे सदस्य अमीर खसरू महमूद चौधरी यांनी अंतरिम सरकारला “पुढील वर्षी एप्रिलमध्ये संसदीय निवडणुका घेऊन मुहम्मद युनूस कोणाचे हित साधण्याचा प्रयत्न करीत आहेत” असा सवाल केला आहे. रविवारी एका कार्यक्रमात बोलताना अमीर खसरू महमूद चौधरी यांनी, “निवडणुकांच्या मुद्द्यावर सरकार आपली तटस्थता गमावत आहे.” असे म्हटले. बीएनपीने म्हटले आहे की एप्रिल २०२६ मध्ये निवडणुका घेण्यात अनेक अडचणी आहेत. रमजान, खराब हवामान आणि परीक्षा यासारख्या मुद्द्यांचा हवाला देत, बीएनपी नेत्याने सांगितले की, या काळात निवडणुका घेणे पूर्णपणे अव्यवहार्य आहे कारण ही योग्य वेळ नाही. “बहुतेक राजकीय पक्षांना डिसेंबरपर्यंत निवडणुका घ्यायच्या आहेत आणि त्यापलीकडे जाण्याचे कोणतेही तार्किक कारण नाही. ते ऑगस्ट किंवा सप्टेंबरमध्येही होऊ शकते.”असेही म्हटले आहे. खसरू म्हणाले की, एप्रिलमध्ये निवडणुका घेण्याची वेळ पूर्णपणे अतार्किक आहे. बीएनपीने थेट सरकारच्या हेतूंवर प्रश्नचिन्ह उपस्थित केले आणि यातून कोणाचे हित साधले जाईल असा प्रश्न विचारला. “जर काही विशिष्ट व्यक्तींचे हितसंबंध प्रबळ राहिले तर अंतरिम सरकारच्या अंतर्गत येणाऱ्या निवडणुका निष्पक्ष होतील की नाही याबद्दल शंका आहेत.” सर्व पक्षांच्या सहमतीने निवडणुकीची तारीख निश्चित करावी, असे आवाहनही त्यांनी सरकारला केले. ६ जून रोजी संध्याकाळी, मुख्य सल्लागार प्रोफेसर मुहम्मद युनूस यांनी घोषणा केली की पुढील राष्ट्रीय निवडणुका एप्रिल २०२६ च्या पहिल्या पंधरवड्यात कोणत्याही दिवशी होतील. शेख हसीना यांच्या पक्षाचा निवडणुकीला विरोध Bangladesh Election। बांगलादेशच्या माजी पंतप्रधान शेख हसीना सध्या भारतात राहत आहेत. त्यांच्या पक्ष अवामी लीगने या निवडणूक योजनेला विरोध केला आहे. युनूस सरकारने शेख हसीना यांच्या पक्षावर बंदी घातली आहे आणि आता हा पक्ष बांगलादेशात निवडणुका लढवू शकत नाही. या पक्षाच्या नेत्यांनी आता भारतासह अनेक देशांमध्ये आश्रय घेतला आहे. या निर्णयाला विरोध करताना, बांगलादेश अवामी लीग यूएसएचे नेते रब्बी आलम म्हणाले की, आपले संविधान हे राष्ट्राच्या मूलभूत तत्त्वांचा आधार आहे आणि हे संविधान अधिकार देते. शेख हसीना लोकशाही पद्धतीने निवडून आल्या आहेत. आम्ही या तथाकथित निवडणुकीचा निषेध करू कारण आमच्या संविधानानुसार शेख हसीना २०२९ पर्यंत पंतप्रधान आहेत. लोकशाही शासनव्यवस्थेत जनता हीच मुख्य शक्ती आहे. लोकांनी शेख हसीनाला मतदान करून निवडून दिले आहे. डिसेंबरपर्यंत निवडणुका घेण्याचे आश्वासन Bangladesh Election। त्याच वेळी, बीएनपीने वारंवार आश्वासन दिले आहे की पक्ष या वर्षी डिसेंबरपर्यंत पुढील संसदीय निवडणुका घेईल. मुहम्मद युनूस यांच्या नवीन घोषणेनंतर, पुढील कारवाई अद्याप निश्चित झालेली नाही. ईदच्या सुट्ट्यांनंतर पक्ष समविचारी पक्ष आणि मित्रपक्षांशी चर्चा करून पुढील कृती आराखडा ठरवेल. बीएनपीचे सरचिटणीस मिर्झा फखरुल इस्लाम म्हणाले, “बांगलादेशात निवडणुका घेण्यासाठी एप्रिलमध्ये दिलेली अंतिम मुदत योग्य नाही. एप्रिलमध्ये खूप उष्णता असते आणि वादळ आणि मुसळधार पाऊस पडण्याची शक्यता असते. रमजाननंतर लगेचच हा महिना येतो आणि सार्वजनिक परीक्षा देखील घेतल्या जातात. आम्हाला वाटत नाही की ही अंतिम मुदत प्रामाणिकपणे निश्चित केली गेली आहे. शिवाय, रमजानमध्ये निवडणूक प्रचार करणे अत्यंत कठीण होईल.”असेही त्यांनी यावेळी म्हटले.
