प्रभात वृत्तसेवा पुणे – आयुष कोमकर हत्या प्रकरणातील आरोपी आणि आंदेकर टोळीचा म्होरक्या बंडू आंदेकर महापालिका निवडणुकीसाठी उमेदवारी अर्ज भरायला भवानी पेठ क्षेत्रीय कार्यालयात कडेकोट बंदोबस्तात आला. तोंडावर काळं कापड, पोलिसांच्या दोरखंडात जखडलेला आणि कडक बंदोबस्तातील आंदेकर अर्ज भरताना विजयाची खूण दाखवत होता. आंदेकरसह तिघांचेही अर्ज अर्धवट असल्याने ते स्विकारले गेले नाहीत. यामुळे पोलिसांनी बंदोबस्त आणि प्रतिबंधात्मक कारवाईसाठी केलेली मेहनत वाया गेली. आता पुन्हा पोलिसांना बंदोबस्ताची तयारी करावी लागेल. यामुळे आंदेकरने पुन्हा तुरुंगातून बाहेर येण्यासाठी ही चाल खेळल्याचे बोलले जात आहे.नेकी का काम, आंदेकर का नाम अशा घोषणांसह त्याने निवडणूक कार्यालयात प्रवेश केला. आंदेकरांना मत म्हणजे विकासकामांना मत. मी उमेदवार आहे, दरोडेखोर नाही. वनराज आंदेकर जिंदाबाद, अशा घोषणा बंडू आंदेकर देत होता. बंडू आंदेकर , लक्ष्मी उदयकांत आंदेकर, सोनाली वनराज आंदेकर यांना शनिवारी अर्ज भरले. त्यांना मिरवणूक, भाषण आणि घोषणाबाजी करण्यास स्पष्ट मनाई केली होती. तरीही आंदेकर घोषणाबाजी करत होता. आंदेकर कुटुंबातील हे तिघेही प्रभाग क्रमांक २२, २३ आणि २४ मधून निवडणूक लढविण्यास इच्छुक आहेत. त्यांनी वकिलांच्या मदतीने अर्ज दाखल केले. मात्र ते अर्धवट असल्याने स्विकारले गेले नाहीत. यामुळे त्यांना पुन्हा अर्ज भरण्यासाठी यावे लागेल. बंडू आंदेकरला खंडणीच्या गुन्ह्यात गुन्हेशाखेच्या पोलीस कोठडीत आहे. लक्ष्मी, सोनाली आंदेकर कोल्हापूरच्या तुरुंगात आहेत. त्यांना तेथून पुण्यात आणले. तिघांनाही साडे अकराला क्षेत्रीय कार्यालयात आणले. ते दुपारी तीन वाजता बाहेर पडले. तोपर्यंत परिसरात कडक बंदोबस्त होता. पोलिसांच्या माहितीनुसार तिघेजण कार्यालयात येईपर्यंत वकिलांनी अर्ज भरुन घेतले नव्हते, तसेच सह्याही घेतल्या नव्हत्या. ते आल्यावर अर्ज भरले.
