Balochistan News : पाकिस्तानातील बलुचिस्तान प्रांतात (Balochistan News) सुरक्षा दलांनी गेल्या काही दिवसात केलेल्या कारवाईमध्ये तब्बल ७३ दहशतवादी ठार करण्यात आले असल्याचा दावा पाक सैन्याने आज केला. बलुचिस्तान प्रांताची राजधानी क्वेट्टा येथे गेल्या ९६ तासांत गुप्त माहितीच्या आधारे या मोहिमा राबवण्यात आल्या, असे इंटर सर्व्हिसेस इंटिलिजन्स या लष्कराच्या माध्यम शाखेने म्हटले आहे.

झियारत आणि नोश्की जिल्ह्यांमध्ये तसेच तुंप जिल्ह्यातील मांड परिसरातही बंदी घातलेल्या दहशतवादी संघटनांविरुद्ध (Balochistan News) मोहिमा करण्यात आल्या. क्वेट्टामधील शाबान परिसरात सुरक्षा दलांनी एका कारवाईत ३३ दहशतवादी ठार केले. यावेळी दहशतवाद्यांविरोधात झालेल्या जोरदार चकमकीनंतर आणि त्यांचे अनेक तळ उध्वस्त करण्यात आले. या कारवाईदरम्यान शस्त्रे, दारुगोळा आणि स्फोटके देखील जप्त करण्यात आली.

दिनांक २१ सप्टेंबर रोजी झियारतमध्ये कारवाई सुरू करण्यात आली. गेल्या ७२ तासांत ही कारवाई अधिक तीव्र करण्यात आली, परिणामी २३ दहशतवादी ठार झाले. शुक्रवारी नोश्की जिल्ह्यात वेगवेगळ्या कारवायांमध्ये ११ दहशतवादी ठार झाले, तर मांडमध्ये आणखी सहा जण मारले गेले, असे आयएसपीआरने म्हटले आहे.

बलुचिस्तानमधील (Balochistan News) दहशतवादी कारवायांमध्ये अफगाणिस्तान तालिबान सरकारचा सक्रिय हात असल्याचा आरोपही पाक लष्कराने केला आहे. या दाव्यावर अफगाणिस्तानमधील तालिबान प्रशासनाने कोणतीही प्रतिक्रिया दिलेली नाही.

एका अन्य घटनेत बलुचिस्तानमधील डुकी जिल्ह्यातील पलारी परिसरात अज्ञात सशस्त्र व्यक्तींनी एका बांधकाम स्थळाला लक्ष्य करून १२ कामगारांचे अपहरण केले. प्रतिकार करणाऱ्या सुरक्षा रक्षकाला ठार केले गेले. तर अन्य दोन सुरक्षा रक्षक जखमी झाले.