BAFTA 2026: लंडनमधील रॉयल फेस्टिव्हल हॉल येथे 79वे ब्रिटिश अकादमी चित्रपट पुरस्कार (बाफ्टा २०२६) मोठ्या उत्साहात पार पडले. रविवारी उशिरा रात्री भारतात या सोहळ्याचे प्रक्षेपण झाले. यंदाच्या बाफ्टा सोहळ्यात भारतीय चित्रपटसृष्टीसाठी अभिमानाचा क्षण ठरला. फरहान अख्तर निर्मित मणिपुरी चित्रपट ‘बूंग’ने बाफ्टा जिंकत इतिहास रचला. बाफ्टा जिंकणारा हा पहिला भारतीय चित्रपट ठरला आहे.

‘बूंग’ने चिल्ड्रन्स अँड फॅमिली फिल्म या गटात सर्वोत्कृष्ट चित्रपटाचा पुरस्कार पटकावला. या यशामुळे भारतीय चित्रपटसृष्टीची जागतिक पातळीवर पुन्हा एकदा दखल घेतली गेली. या चित्रपटात ईशान्य भारतातील संवेदनशील कथा मांडण्यात आली असून, त्याच्या आशय आणि सादरीकरणाचे आंतरराष्ट्रीय स्तरावर कौतुक झाले.

या सोहळ्यात अभिनेत्री आलिया भट्ट प्रेझेंटर म्हणून उपस्थित होती. तिच्या उपस्थितीने भारतीय चाहत्यांचे लक्ष वेधले. तसेच निर्माता-कलाकार फरहान अख्तर यांच्यासाठीही हा क्षण विशेष ठरला.

दरम्यान, हॉलिवूड चित्रपट ‘सिनर्स’चा यंदाच्या बाफ्टा सोहळ्यात जबरदस्त दबदबा दिसून आला. ‘सिनर्स’ने ओरिजिनल स्क्रीनप्लेचा पुरस्कार जिंकला. त्याच चित्रपटासाठी अभिनेत्री वुन्मी मोसाकू हिला सर्वोत्कृष्ट सहाय्यक अभिनेत्रीचा सन्मान मिळाला. याशिवाय ‘सिनर्स’ने ओरिजिनल स्कोर (संगीत) या विभागातही पुरस्कार पटकावला. एकूणच अनेक महत्त्वाच्या गटांत ‘सिनर्स’ने आपली छाप सोडली.

The winner of the BAFTA in the Children’s & Family Film category is Boong ✨ #EEBAFTAs pic.twitter.com/Tn0oh5BKpM

— BAFTA (@BAFTA) February 22, 2026

‘सिनर्स’बरोबरच One Battle After Another या चित्रपटाचीही बाफ्टामध्ये चांगलीच चर्चा झाली. या चित्रपटात Leonardo DiCaprio प्रमुख भूमिकेत आहे. या चित्रपटासाठी मायकेल बाउमन यांना सर्वोत्कृष्ट छायाचित्रणाचा (सिनेमॅटोग्राफी) पुरस्कार मिळाला. तसेच दिग्दर्शक Paul Thomas Anderson यांना अॅडॅप्टेड स्क्रीनप्लेचा सन्मान मिळाला. चित्रपटाच्या एडिटिंगसाठी अँडी जुर्गेंसन यांना बाफ्टा प्रदान करण्यात आला.

एकंदरीत, बाफ्टा 2026 सोहळा भारतीय आणि आंतरराष्ट्रीय चित्रपटसृष्टीसाठी खास ठरला. ‘बूंग’च्या ऐतिहासिक विजयामुळे भारताचा झेंडा पुन्हा एकदा जागतिक व्यासपीठावर फडकला, तर ‘सिनर्स’ आणि ‘वन बॅटल आफ्टर अनदर’ या चित्रपटांनीही आपल्या उत्कृष्टतेची छाप उमटवली. यंदाचा बाफ्टा सोहळा अनेक संस्मरणीय क्षणांनी सजला.