Babar Azam Dismissal Jofra Archer Bouncer Lords Test ENG vs PAK Series : लॉर्ड्सच्या ऐतिहासिक मैदानावर इंग्लंडविरुद्ध खेळल्या जात असलेल्या दुसऱ्या कसोटी सामन्यात पाकिस्तानचा कर्णधार बाबर आझम (Babar Azam) इंग्लंडच्या वेगवान माऱ्यासमोर पुन्हा एकदा सपशेल अपयशी ठरला. विजयासाठी मिळालेल्या ३८९ धावांच्या आव्हानाचा पाठलाग करताना बाबर आझम अवघ्या ६ धावांवर माघारी परतला. इंग्लंडचा स्टार वेगवान गोलंदाज जोफ्रा आर्चरच्या (Jofra Archer) एका भयानक बाउन्सरवर चेंडू न पाहताच विचित्र फटका मारण्याच्या नादात बाबरने आपली विकेट बहाल केली. त्याच्या या अनाकलनीय फटक्यामुळे मैदानावरील सर्वच जण चकित झाले.

आर्चरचा वेग अन् बाउन्सरची दहशत; हेल्मेटच्या ग्रीलला लागून चेंडू हवेत!

डावाच्या ८ व्या षटकात जोफ्रा आर्चरने टाकलेला एक उसळता बाउन्सर बाबरला अजिबात ओळखता आला नाही. आर्चरच्या प्रचंड वेगामुळे गोंधळलेल्या बाबरने डोळे मिटून बॅट आडवी लावली. चेंडू थेट त्याच्या बॅटची कडा घेऊन हेल्मेटच्या ग्रीलवर आदळला आणि स्लिपच्या दिशेने हवेत उडाला, जिथे जॉर्डन कॉक्सने कोणतीही चूक न करता सोपा झेल टिपला. हा चेंडू इतका धोकादायक होता की बाबरला गंभीर दुखापतही होऊ शकली असती. आर्चरच्या या बाउन्सरने बाबरच्या तंत्राची पुरती पोलखोल केली.

दुखापतीतून पुनरागमन ठरले फ्लॉप; दोन्ही डावांत स्वस्तात गारद –

Too fast. Too furious 😤

Babar bounced out! ☝️

Match Centre: https://t.co/Z9bsIoMyb6 pic.twitter.com/zHcVPdCmsd

— England Cricket (@englandcricket) August 30, 2026

हाताच्या बोटाच्या दुखापतीमुळे पहिल्या कसोटीला मुकलेल्या बाबर आझमचे या सामन्यातील पुनरागमन पूर्णपणे निराशाजनक राहिले. पहिल्या डावात तो केवळ ८ धावांवर बाद झाला होता, तर दुसऱ्या डावात ८ चेंडूंत फक्त ६ धावा करू शकला. पाकिस्तानची सुरुवात अत्यंत खराब झाली; सलामीवीर अब्दुल्ला शफिक शून्यावर, तर अझान अवैस ६ धावा करून बाद झाले. अवघ्या ७ धावांत २ गडी गमावल्यानंतर बाबरही तंबूत परतल्याने पाकिस्तानची अवस्था ३ बाद ५३ अशी बिकट झाली.

हेही वाचा – Suryakumar Yadav Reveals : “सॅमसनला बाहेर ठेवणं सर्वात कठीण निर्णय…!”, सूर्याचा टी-२० विश्वचषक २०२६ बाबत मोठा खुलासा

३८९ धावांचे खडतर आव्हान; शान मसूद आणि सौद शकीलची झुंज –

इंग्लंडचा दुसरा डाव २०८ धावांवर आटोपल्यानंतर पाकिस्तानसमोर विजयासाठी ३८९ धावांचे डोंगराएवढे आव्हान उभे राहिले आहे. आघाडीची फळी ढासळल्यानंतर शान मसूद आणि सौद शकील यांनी अर्धशतकीय भागीदारी करत डावाला सावरण्याचा प्रयत्न केला. लॉर्ड्सच्या या कसोटीत इंग्लंडच्या गोलंदाजांनी निर्माण केलेल्या दहशतीसमोर पाकिस्तानचा संघ हा सामना वाचवण्यात यशस्वी होणार का, याकडे संपूर्ण क्रिकेट विश्वाचे लक्ष लागले आहे.