Babaji Kale – चाकण एमआयडीसी परिसरातील सुमारे 20 कंपन्या संभाव्य स्थलांतराच्या मार्गावर असल्याची गंभीर बाब समोर आली आहे. वाहतूक कोंडी, रस्ते, पाणीपुरवठा आणि अन्य मूलभूत सुविधांच्या प्रश्नांमुळे उद्योजकांमध्ये चिंता निर्माण झाली असून, या पार्श्वभूमीवर खेड-आळंदी विधानसभा मतदारसंघाचे आमदार बाबाजी काळे यांनी मंत्रालयात उपमुख्यमंत्री तथा पुणे जिल्ह्याच्या पालकमंत्री सुनेत्राताई पवार यांची भेट घेऊन चाकण औद्योगिक क्षेत्रातील समस्यांवर सविस्तर चर्चा केली.

चाकण एमआयडीसी हे पुणे जिल्ह्यासह राज्याच्या औद्योगिक विकासातील महत्त्वाचे केंद्र आहे. या परिसरातील उद्योगांवर हजारो कामगारांचा रोजगार अवलंबून आहे. त्यामुळे कंपन्यांचे स्थलांतर झाल्यास स्थानिक रोजगाराबरोबरच लघु व मध्यम उद्योग, सेवा क्षेत्र आणि परिसराच्या आर्थिक विकासावरही प्रतिकूल परिणाम होण्याची शक्यता आहे.

चाकण औद्योगिक क्षेत्रातील समस्या एका विभागापुरत्या मर्यादित नसल्याने वाहतूक पोलीस, एमआयडीसी, सार्वजनिक बांधकाम विभाग, पाणीपुरवठा विभाग, पीएमआरडीए, एमएसआरडीसी, महामार्ग प्राधिकरण तसेच अन्य संबंधित विभागांची संयुक्त बैठक तातडीने घेण्यात यावी, अशी मागणी आमदार काळे यांनी उपमुख्यमंत्र्यांकडे केली.

या बैठकीत चाकण परिसरातील वाहतूक कोंडी, रस्ते व सेवा रस्ते, वाहतूक व्यवस्थापन, पाणीपुरवठा आणि अन्य पायाभूत सुविधांचा एकत्रित आढावा घेऊन प्रत्येक विभागाची जबाबदारी निश्चित करावी. तसेच समस्यांवर वेळबद्ध पद्धतीने उपाययोजना करण्यात याव्यात, अशी भूमिका त्यांनी मांडली.

पायाभूत सुविधांसाठी निधीची मागणी
चाकण एमआयडीसी परिसरातील मूलभूत सुविधा सक्षम करण्यासाठी आवश्यक निधी तातडीने उपलब्ध करून देण्याची मागणीही आमदार काळे यांनी केली. औद्योगिक क्षेत्रातील उद्योग टिकले पाहिजेत आणि स्थानिक रोजगार अबाधित राहिला पाहिजे. वाहतूक कोंडी, रस्ते, पाणीपुरवठा व अन्य मूलभूत सुविधांचे प्रश्न तातडीने सोडविल्यास उद्योजकांचा शासनावरील विश्वास कायम राहण्यास मदत होईल, असे त्यांनी सांगितले.

उपमुख्यमंत्र्यांकडून सकारात्मक प्रतिसाद
उपमुख्यमंत्री तथा पुणे जिल्ह्याच्या पालकमंत्री सुनेत्राताई पवार यांनी आमदार काळे यांनी मांडलेल्या समस्यांची दखल घेतली. संबंधित सर्व विभागांच्या समन्वयातून चाकण एमआयडीसीच्या प्रश्नांवर बैठक घेण्याबाबत त्यांनी सकारात्मक भूमिका व्यक्त केली. चाकण एमआयडीसीतील उद्योगांचे संभाव्य स्थलांतर रोखण्याबरोबरच परिसरातील वाहतूक आणि पायाभूत सुविधांचे प्रश्न कायमस्वरूपी मार्गी लावण्यासाठी आमदार बाबाजी काळे यांचा शासनस्तरावर पाठपुरावा सुरू राहणार आहे.