Baba Siddique Murder Case : माजी मंत्री बाबा सिद्दीकी यांच्‍या हत्‍या प्रकरणी दररोज नवनवे खुलासे समोर येत आहेत. या घटनेत लॉरेन्स बिश्नोई टोळीचा सहभाग असल्याचीही माहिती समोर आली होती.

या प्रकरणी एका भंगार विक्रेत्‍याला रविवारी अटक करण्‍यात आली आहे. या प्रकरणी मुंबई पोलिसांची गुन्हे शाखा करत असून आतापर्यंत 10 आरोपींना अटक करण्यात आली आहे.

बाबा सिद्दीकी हत्या प्रकरणाचा पोलिसांकडून कसून तपास सुरु आहे. आज मुंबई पोलिसांच्या गुन्हे शाखेने आणखी एका आरोपीला अटक केली आहे. हरियाणातील कैथल येथील रहिवासी असलेल्या 29 वर्षीय अमितला पोलिसांनी अटक केली आहे.

त्यामुळे याप्रकरणी आतापर्यंत 11 आरोपींना पोलिसांनी अटक केली आहे. हरियाणाचा रहिवासी गुरमेल सिंग आणि उत्तर प्रदेशचा रहिवासी धर्मराज कश्यप हे दोन शूटर देखील अटकेत आहेत. तर तिसरा शूटर शिवकुमार गौतम हा खुनाच्या कटात सहभागी असलेल्या इतर काही लोकांसह फरार झाला आहे.

माजी मंत्री आणि राष्ट्रवादीचे नेते बाबा सिद्दीकी यांच्यावर रात्री साडेनऊच्या सुमारास वांद्रे येथील निर्मल नगर परिसरात गोळ्या झाडण्यात आल्याने ते गंभीर जखमी झाले होते. त्यांना तातडीने लीलावती रुग्णालयात दाखल करण्यात आलं होतं. पण त्याआधीच त्यांचा मृत्यू झाला होता.

बाबा सिद्दिकी यांना का मारण्यात आलं याचा तपास गुन्हे शाखा करत आहे. पण याबाबत अजून कोणतीही माहिती समोर आलेली नाही. हत्येची जबाबदारी लॉरेन्स बिश्नोई गँगने घेतली होती. पण तरी देखील पोलीस वेगवेगळ्या अँगलने याचा तपास सुरु केलाय.

या हत्येमागे कोणाचा हात आहे. खरा सूत्रधार कोण याचा शोध सुरु आहे. आज 11 व्या आरोपीने अटक केल्यानंतर त्याला कोर्टात हजर केलं जाणार आहे. त्यानंतर पोलीस त्याची कस्टडी मागून याचा पुढील तपास करणार असून, सर्व माहिती मिळणार असल्याचं सांगण्यात आलं आहे.