Eknath Shinde ।  Baba Siddique Shot Dead : उपमुख्यमंत्री अजित पवार यांच्या राष्ट्रवादी काँग्रेसचे नेते बाबा सिद्दिकी  यांचा गोळीबारात मृत्यू झाला. गोळीबार करणाऱ्या तीन पैकी दोन आरोपींना अटक करण्यात आली आहे.

दरम्यान, बाबा सिद्दीकी यांच्या हत्येची जबाबदारी लॉरेन्स बिश्नोई गॅंगने घेतली आहे. यावरून आता शिवसेना नेते संजय राऊत यांनी सरकारवर गंभीर आरोप केले आहेत.

सरकारवर ताशेरे ओढत संजय राऊत म्हणाले, “हिंमत असेल तर या घटनेचा सूत्रधार बाबा सिद्दीकी यांच्यावर गोळीबार करणाऱ्याचा एन्काउंटर करा” असे आव्हान दिले आहे.

तर दुसरीकडे राज्याचे मुख्यमंत्री एकनाथ शिंदे यांनी “बाबा सिद्धीकींची हत्या करणाऱ्यांना सोडणार नाही. सर्वांना फाशी देऊ” असं म्हंटल आहे. मुंबईत इतर राज्यातून येऊन दादागिरी केलेली सहन केली जाणार नाही असा इशाराही एकनाथ शिंदे म्हणाले आहेत

बाबा सिद्धीकी यांच्या हत्येनंतर विरोधक कायदा-सुव्यवस्थेवर प्रश्नचिन्ह उपस्थित करत असल्याबद्दल विचारण्यात आलं असता एकनाथ शिंदे यांनी जोरदार टीका केली. “आरोपीने पोलिसांवर गोळी चालवली तर पोलिसांनी गोळी का चालवली? असं विचारतात.

हे डबल ढोलकीवाले आहेत. यांच्यात काही नैतिकता नाही. बदलापूरमधील आरोपीची बाजू घेणारे हे लोक काय कायद्याची भाषा करतात”.

बाबा सिद्धीकींची हत्या करणाऱ्यांना सोडणार नाही. सर्वांना फाशी देऊ असं एकनाथ शिंदे म्हणाले आहेत. “बाबा सिद्धीकी लोकप्रतिनिधी होते. दोघांना अटक केली असून एक फऱार आहे, त्याला लवकर पकडलं जाईल.

फास्ट ट्रॅक कोर्टात खटला लढून फाशी देण्याची विनंती करु. मुंबईत इतर राज्यातून येऊन दादागिरी केलेली सहन केली जाणार नाही,” असं देखील मुख्यमंत्री शिंदे यावेळी म्हणाले.