Axar Patel Record : अक्षर पटेलचा ऐतिहासिक पराक्रम! हॅरी ब्रूकची विकेट घेत रचला जागतिक कीर्तिमान; ठरला भारताचा पहिलाच फिरकीपटू
Axar Patel Record : अक्षर पटेल आता आंतरराष्ट्रीय टी-२० क्रिकेटमध्ये १०० विकेट्स घेणारा भारताचा पहिला फिरकी गोलंदाज ठरला आहे.
Axar Patel 100 T20I Wickets IND vs ENG 2nd T20I Manchester Arshdeep Singh : भारत आणि इंग्लंड यांच्यात मँचेस्टर येथे खेळल्या जात असलेल्या दुसऱ्या टी-२० आंतरराष्ट्रीय सामन्यात भारताचा स्टार अष्टपैलू खेळाडू अक्षर पटेल याने इतिहास रचला आहे. इंग्लंडचा कर्णधार हॅरी ब्रूक याला बाद करत अक्षरने अशी कामगिरी केली आहे, जी आजवर भारताच्या एकाही फिरकीपटूला जमलेली नाही. अक्षर पटेल आता आंतरराष्ट्रीय टी-२० क्रिकेटमध्ये १०० विकेट्स घेणारा भारताचा पहिला फिरकी गोलंदाज ठरला आहे. तसेच, या फॉरमॅटमध्ये १०० विकेट्सचा टप्पा ओलांडणारा तो एकंदरीत चौथा भारतीय गोलंदाज ठरला आहे.
युझवेंद्र चहलला टाकले मागे; अर्शदीप सिंग अव्वल स्थानी –
अक्षर पटेल आता भारतासाठी आंतरराष्ट्रीय टी-२० मध्ये सर्वाधिक विकेट्स घेणारा फिरकीपटू बनला आहे. त्याने युझवेंद्र चहलचा (९६ विकेट्स) विक्रम मागे टाकला आहे. भारतासाठी या फॉरमॅटमध्ये सर्वाधिक विकेट्स घेणाऱ्या गोलंदाजांच्या यादीत वेगवान गोलंदाज अर्शदीप सिंग १३३ विकेट्ससह अव्वल स्थानावर आहे, तर जसप्रीत बुमराह (१२१ विकेट्स) दुसऱ्या आणि हार्दिक पंड्या (११४ विकेट्स) तिसऱ्या क्रमांकावर आहे.
भारतासाठी सर्वाधिक टी-२० आंतरराष्ट्रीय विकेट्स घेणारे टॉप ५ गोलंदाज:
First #TeamIndia spinner to 1️⃣0️⃣0️⃣ T20I wickets 👏
A major milestone for Axar Patel 💙🫡
Updates ▶️ https://t.co/WYfL8tAm58 #ENGvIND | @akshar2026 pic.twitter.com/Uv20EKojGM
— BCCI (@BCCI) July 4, 2026
- अर्शदीप सिंग – १३३ विकेट्स
- जसप्रीत बुमराह – १२१ विकेट्स
- हार्दिक पंड्या – ११४ विकेट्स
- अक्षर पटेल – १०० विकेट्स
- युझवेंद्र चहल – ९६ विकेट्स
हॅरी ब्रूकला बाद करत सामन्याला दिली कलाटणी –
या सामन्यात भारताने प्रथम फलंदाजी करताना निर्धारित २० षटकांत ७ बाद १९० धावांचा डोंगर उभा केला आणि इंग्लंडला १९१ धावांचे आव्हान दिले. या आव्हानाचा पाठलाग करताना इंग्लंडची फलंदाजी गडबडली. इंग्लंडचा कर्णधार हॅरी ब्रूक खेळपट्टीवर स्थिरावलेला दिसत होता. मात्र, अक्षर पटेलच्या लेग साईडच्या चेंडूवर स्वीप मारण्याच्या नादात तो यष्टिरक्षक इशान किशनकडे झेल देऊन बाद झाला. ब्रूकची ही महत्त्वपूर्ण विकेट घेताच अक्षरने आपल्या १०० विकेट्स पूर्ण केल्या आणि भारताच्या विजयाच्या आशा उंचावल्या.
