Australian Jockey Izzy Neale Dies In Horse Racing Accident Warren Shire Cotton Cup : ऑस्ट्रेलियन हॉर्स रेसिंग जगतातून एक अत्यंत धक्कादायक आणि हृदयद्रावक बातमी समोर आली आहे. अवघ्या २२ वर्षांची प्रतिभावान महिला जॉकी इजी नील हिचा शर्यतीदरम्यान झालेल्या भीषण अपघातात मृत्यू झाला आहे. न्यू साउथ वेल्स येथे ८ नोव्हेंबर रोजी आयोजित ‘वॉरेन शायर कॉटन कप’ स्पर्धेत घोड्यावरील नियंत्रण सुटल्याने ती खाली कोसळली. यानंतर गंभीर जखमी अवस्थेत तिला तातडीने एअरलिफ्ट करून रुग्णालयात दाखल करण्यात आले होते; मात्र लाइफ सपोर्टवर असलेल्या इजीने १० नोव्हेंबर रोजी अखेरचा श्वास घेतला.

४०० मीटरच्या वळणावर भीषण अपघात; घोड्याला द्यावी लागली इच्छामृत्यू

शर्यत सुरू असताना सुमारे ४०० मीटरच्या अंतरावर हा दुर्दैवी अपघात घडला. वेगाने धावणाऱ्या ‘मारनू’ नावाच्या घोड्यावरून तोल गेल्याने इजी थेट जमिनीवर आदळली आणि जागीच बेशुद्ध पडली. या अपघाताचे गांभीर्य लक्षात घेऊन उर्वरित शर्यत तत्काळ रद्द करण्यात आली. गंभीर दुखापतीमुळे तिच्या ‘मारनू’ या घोड्यालाही मानवी दृष्टिकोनातून इच्छामृत्यू द्यावा लागला. याच घटनेत दुसरा जॉकी डिएगो माँटेस डी ओका हा देखील घोड्यावरून घसरून पडल्याने जखमी झाला.

‘चालण्याआधीच शिकली होती घोडेस्वारी’; कुटुंबीय भावुक

The Australian racing community is in mourning after the death of apprentice jockey Izzy Neale, aged 22.

Neale fell at the country NSW track of Warren on Sunday and died on Tuesday.

The thoughts of the entire racing world are with her family and friends. https://t.co/Q51ubrdRlN

— World Horse Racing (@WHR) November 10, 2026

रेसिंग एनएसडब्ल्यूने जारी केलेल्या निवेदनात इजीच्या कुटुंबीयांनी तीव्र दुःख व्यक्त केले. “अत्यंत जड अंतःकरणाने आम्ही आमच्या लाडक्या इजीच्या निधनाची माहिती देत आहोत. तिने स्वतःच्या पायांवर चालायला शिकण्यापूर्वीच घोड्यांवर स्वार होण्यास सुरुवात केली होती. घोड्यांवरील तिचे प्रेम हा तिच्या आयुष्यातील सर्वात मोठा ध्यास होता,” अशा भावनिक शब्दांत तिच्या कुटुंबीयांनी भावना व्यक्त केल्या. एप्रिल २०१७ मध्ये जॉकी डॅरेन जोन्स यांच्या निधनानंतर न्यू साउथ वेल्समधील रेसिंगदरम्यान घडलेली ही पहिलीच दुर्दैवी घटना ठरली.

हेही वाचा – Arshdeep Singh Engagement : भारताच्या स्टार गोलंदाजाची नवी इनिंग; अर्शदीपने अभिनेत्री समरीनला प्रपोज करत न्यूझीलंडमध्ये उरकला साखरपुडा, फोटो केले शेअर

दुःखाच्या प्रसंगातही घेतला आदर्श निर्णय; अवयवदान करण्याचा संकल्प

या मोठ्या दुःखाच्या प्रसंगातही इजीच्या कुटुंबीयांनी एक अत्यंत प्रेरणादायी आणि उदात्त पाऊल उचलले. त्यांनी इजीचे सर्व अवयव दान करण्याचा निर्णय जाहीर केला, जेणेकरून अनेक गरजू रुग्णांना जीवनदान मिळू शकेल. या कठीण काळात तिच्या कुटुंबीयांनी रेसिंग समुदाय, एनएसडब्ल्यू जॉकी असोसिएशन आणि रुग्णालयातील डॉक्टरांचे मनापासून आभार मानले.