Attack On Police – अवैध हातभट्टी दारूचा धंदा उधळण्यासाठी गेलेल्या पोलिसांवरच आरोपींनी दुचाकी घालून हल्ला केल्याची धक्कादायक घटना शिंदवणे (ता. हवेली) येथे स्वातंत्र्यदिनी घडली. पोलिसांनी थांबण्याचा इशारा करूनही आरोपींनी पोलिसांच्या अंगावर दुचाकी घालून पलायन करण्याचा प्रयत्न केला. या घटनेत दोन पोलीस कर्मचारी जखमी झाले. पोलिसांवरच हल्ला करण्यापर्यंत अवैध धंदे करणार्‍यांची मजल गेल्याने परिसरात खळबळ उडाली असून, हातभट्टी दारूच्या अवैध व्यवसायाचा प्रश्न पुन्हा ऐरणीवर आला आहे.

अक्षय व्यंकट राठोड (वय 30), जगदीश संतोष राठोड (वय 19) आणि कांतीलाल जवाहर राठोड (वय 40, तिघेही रा. काळेशिवार, कंजारभट वस्ती, शिंदवणे, ता. हवेली) अशी गुन्हा दाखल झालेल्या आरोपींची नावे आहेत. शिंदवणे येथील काळेशिवार, कंजारभट वस्ती परिसरातील कॅनॉलच्या उत्तर बाजूला झाडाझुडपांमध्ये मोठ्या प्रमाणावर गावठी हातभट्टी दारू तयार केली जात असल्याची माहिती उरुळी कांचन पोलिसांना मिळाली होती.

त्यानुसार दि. 15 रोजी दुपारी साडेबारा वाजण्याच्या सुमारास पोलीस हवालदार कमलेश होले, पोलीस अंमलदार मनोज रत्नपारखी यांच्यासह पोलिसांचे पथक घटनास्थळी दाखल झाले. पोलिसांनी पाहणी केली असता जमिनीत दोन मोठे खड्डे खोदून त्यामध्ये प्रत्येकी सुमारे एक हजार लिटर क्षमतेचे लोखंडी बॅरल पुरून ठेवण्यात आल्याचे आढळून आले. त्यामध्ये गुळाचे खडे, झाडांच्या साली, नवसागर आदींच्या मिश्रणातून तयार केलेले सुमारे 1200 लिटर कच्चे विषारी रसायन आढळून आले.

पोलिसांनी छापा टाकल्याचे लक्षात येताच आरोपींनी घटनास्थळावरून पळून जाण्याचा प्रयत्न केला. पोलिसांनी त्यांना थांबण्याचा इशारा दिला. मात्र, आरोपींनी पोलिसांच्या आदेशाकडे दुर्लक्ष करत त्यांच्या ताब्यातील होंडा शाईन (क्रमांक एमएच 12 क्यूएन 6411) तसेच एका विनानंबरच्या दुचाकीने पोलिसांच्या अंगावर वाहने घातली. या धडकेत पोलीस हवालदार कमलेश होले आणि पोलीस अंमलदार मनोज रत्नपारखी खाली पडून जखमी झाले.