Atrocity Act Case – खटाव तालुक्यातील राजाचे कुर्ले येथे शेतकरी बचत गटाच्या बैठकीत एका वृद्धाला जातीवाचक शिवीगाळ करत हाताने मारहाण केल्याची धक्कादायक घटना घडली आहे. दारूच्या नशेत आलेल्या संशयिताने वृद्धाला खुर्चीवरून लाथ मारून खाली पाडत दमदाटी केली. याप्रकरणी औंध पोलीस ठाण्यात एकाविरुद्ध गुन्हा दाखल करण्यात आला आहे. संजीवन दगडू शेडगे (वय 66) असे मारहाण झालेल्या वृद्धाचे नाव असून, त्यांनी याप्रकरणी औंध पोलीस ठाण्यात फिर्याद दिली आहे.

त्यांच्या फिर्यादीवरून गावचा रहिवासी असलेल्या हणमंत यशवंत गुरव या संशयित आरोपीविरुद्ध अ‍ॅट्रॉसिटी कायद्यान्वये गुन्हा नोंदवण्यात आला आहे. पोलिसांकडून मिळालेल्या माहितीनुसार, राजाचे कुर्ले गावच्या सरपंच यांच्या घरासमोरील सोप्यात शेतकरी बचत गटाची बैठक आयोजित करण्यात आली होती. या बैठकीत सर्व सभासदांना औषध वाटप करण्याचे काम सुरू असताना हणमंत गुरव हा दारू पिऊन त्या ठिकाणी आला. बैठक सुरू असताना त्याने संजीवन शेडगे यांना भर बैठकीत जातीवाचक शिवीगाळ केली.

एवढ्यावरच न थांबता आरोपीने शेडगे यांना मारहाण केली आणि ते बसलेल्या खुर्चीला लाथ मारून त्यांना खाली पाडले. या घटनेनंतर गावातील बचत गटाच्या व मिटींगमधील सभासदांची चर्चा करून निर्णय घेण्यास वेळ लागल्यामुळे शनिवारी याप्रकरणी औंध पोलिसात अधिकृत तक्रार दिली आहे. सहाय्यक पोलीस निरीक्षक सुनील जानकर यांनी तातडीने घटनास्थळाला भेट देऊन पाहणी केली. सातारा ग्रामीणच्या उपविभागीय पोलीस अधिकारी राजश्री तेरणी यांच्या मार्गदर्शनाखाली औंध पोलीस तपास करत आहेत.