Asia Cup 2025 Prize Money Boosted : आशिया कप 2025 मधील पहिल्या सामन्यात अफगानिस्तान आणि हाँगकाँग यांच्यात लढत होणार आहे. यानंतर भारत आपल्या मोहिमेची सुरुवात 10 सप्टेंबरला दुबई आंतरराष्ट्रीय क्रिकेट स्टेडियमवर संयुक्त अरब अमिराती (यूएई) विरुद्ध करेल. स्पर्धेचा अंतिम सामना 28 सप्टेंबरला दुबईत खेळवला जाणार आहे. पुढील वर्षी भारत आणि श्रीलंका यांच्या संयुक्त यजमानपदाखाली टी-20 विश्वचषक होणार असल्याने हा आशिया कपही टी-20 स्वरूपात खेळवला जाणार आहे.

आशिया कप 2025 ची बक्षिस रक्कम –

2023 मध्ये झालेल्या आशिया कपमध्ये विजेत्या संघाला 2 लाख डॉलर बक्षिस मिळाले होते. यंदा ही रक्कम वाढवण्यात आली आहे. अहवालानुसार, आशिया कप 2025 च्या विजेत्या संघाला 3 लाख डॉलर (सुमारे 2.65 कोटी रुपये) मिळतील, तर उपविजेत्या संघाला 1.5 लाख डॉलरवर समाधान मानावे लागेल. मात्र, आशियन क्रिकेट कौन्सिलने अद्याप बक्षिस रकमेबाबत अधिकृत घोषणा केलेली नाही.

आठ संघ, 21 सामने –

आशिया कप 2025 मध्ये एकूण 8 संघ सहभागी होत आहेत. भारत, पाकिस्तान, बांगलादेश, श्रीलंका, अफगानिस्तान, यूएई, ओमान आणि हाँगकाँग हे संघ आहेत. टूर्नामेंटमध्ये एकूण 21 सामने खेळवले जातील. आठ संघांना दोन गटांमध्ये विभागले गेले आहे. प्रत्येक गटातील पहिल्या दोन संघ सुपर-4 मध्ये प्रवेश करतील. सुपर-4 मध्ये सर्व संघ एकमेकांविरुद्ध खेळतील. यातील पहिल्या दोन संघांना अंतिम सामन्यात स्थान मिळेल. अंतिम सामना 28 सप्टेंबरला दुबईत होईल.

हेही वाचा – Asia Cup 2025 : पहिल्या सामन्यात कोण ठरणार वरचढ? जाणून घ्या अफगाणिस्तान-हाँगकाँगचा हेड टू हेड रेकॉर्ड

भारत-पाक तीन वेळा आमनेसामने येण्याची शक्यता –

आशिया कप 2025 मध्ये भारत आणि पाकिस्तान यांच्यात तीन वेळा सामना होण्याची शक्यता आहे. पहिला सामना 14 सप्टेंबरला होईल. दोन्ही संघांचा सुपर-4 मध्ये प्रवेश जवळपास निश्चित मानला जात आहे, त्यामुळे 21 सप्टेंबरला पुन्हा एकदा त्यांच्यात लढत होऊ शकते. जर भारत आणि पाकिस्तान सुपर-4 मध्ये पहिल्या दोन स्थानी राहिले, तर अंतिम सामन्यातही त्यांची टक्कर होऊ शकते. आतापर्यंत आशिया कपच्या अंतिम सामन्यात भारत आणि पाकिस्तान यांच्यात सामना झालेला नाही.