Ashwiny Iyer Tiwari: बॉलिवूडमधील प्रसिद्ध दिग्दर्शिका अश्विनी अय्यर तिवारी यांनी नुकताच आपल्या ड्रीम प्रोजेक्टचा खुलासा केला आहे. ‘निल बटे सन्नाटा’ आणि ‘बरेली की बर्फी’सारख्या यशस्वी चित्रपटांसाठी ओळखल्या जाणाऱ्या अश्विनी यांनी सांगितले की, त्यांना मोठ्या बजेटची फिल्म बनवायची आहे आणि त्यात त्या दीपिका पादुकोण, आलिया भट्ट आणि साई पल्लवी यांना एकत्र कास्ट करू इच्छितात. एका फिल्म फेस्टिव्हलदरम्यान त्यांनी ही इच्छा व्यक्त केली. त्यांनी सांगितले की, “माझ्या विश लिस्टमध्ये अनेक कलाकार आहेत, पण सध्या दीपिका, आलिया आणि साई पल्लवी या तिघी आहेत. मला आशा आहे की त्या माझं म्हणणं ऐकत असतील.” त्यांनी ही इच्छा ‘युनिव्हर्स’मध्ये पाठवत असल्याचंही मजेशीरपणे सांगितलं. Sai Pallavi या प्रोजेक्टबद्दल बोलताना अश्विनी यांनी फिल्म इंडस्ट्रीतील जेंडर विषमतेवरही भाष्य केलं. त्या म्हणाल्या, “१०० किंवा १००० कोटींचा चित्रपट एखादी महिला का बनवू शकत नाही? फक्त पुरुष दिग्दर्शकच का मोठे प्रोजेक्ट करतात?” त्यांच्या या वक्तव्याने अनेकांचं लक्ष वेधलं आहे. विशेष म्हणजे त्यांचे पती नितेश तिवारी हेही मोठ्या बजेटच्या चित्रपटांवर काम करत आहेत. अश्विनी यांनी सांगितलं की, मोठा प्रोजेक्ट बनवण्यासाठी फक्त कल्पना पुरेशी नसते, तर प्रोडक्शन स्टुडिओचं मजबूत समर्थनही तितकंच गरजेचं असतं. बजेट, प्लॅनिंग आणि दीर्घकालीन धोरण या गोष्टी महत्त्वाच्या असतात. त्याचबरोबर त्यांनी भविष्यात अॅक्शन चित्रपट करण्याची इच्छा व्यक्त केली. त्यांना अॅक्शनसोबत इमोशन असलेले चित्रपट आवडतात. त्यांनी ‘स्पायडर-मॅन’ आणि ‘शहंशाह’सारख्या चित्रपटांचा उल्लेख करत आपली आवड स्पष्ट केली. तसेच त्यांनी गीतू मोहनदास यांच्या ‘टॉक्सिक’ या चित्रपटाचं कौतुक केलं आणि यश यांचंही अभिनंदन केलं. nitesh tiwari-Ashwiny Iyer Tiwari अश्विनी म्हणाल्या की, चांगली कथा आणि दिग्दर्शकावर विश्वास असेल, तर चित्रपट मोठा होऊ शकतो. त्यासाठी दिग्दर्शक पुरुष आहे की महिला, याला महत्त्व नसतं. त्यांनी हेही सांगितलं की, प्रेक्षकांची आवड समजून घेण्यासाठी त्या स्वतः थिएटरमध्ये जाऊन चित्रपट पाहतात. अश्विनी अय्यर तिवारी या मूळच्या मुंबईतील असून त्यांनी जाहिरात क्षेत्रात अनेक वर्ष काम केलं आहे. त्यानंतर त्यांनी चित्रपटसृष्टीत प्रवेश केला आणि आज त्या एक यशस्वी दिग्दर्शिका व निर्माती म्हणून ओळखल्या जातात. त्यांच्या या ड्रीम प्रोजेक्टची चर्चा सध्या जोरात असून, जर हा प्रोजेक्ट साकार झाला तर बॉलिवूडमध्ये मोठा बदल घडू शकतो.
