Ashok Saraf । Laxmikant Berde : मराठी रसिक प्रेक्षकांच्या मनावर अधिराज्य गाजवणारा हरहुन्नरी अभिनेते म्हणजे ‘लक्ष्मीकांत बेर्डे’. त्यांनी आपल्या अभिनयाने आणि विनोदाने लोकांना खळखळून हसायला भाग पाडले. गिरगावातील कुंभारवाड्यात जन्मलेल्या लक्ष्मीकांत बेर्डे यांनी जवळपास दोन दशकं मराठी सिनेसृष्टीवर अधिराज्य गाजवलं. आपल्या दमदार अभिनयाने आणि विनोदी शैलीने लक्ष्या मामांनी रसिकांच्या मनात अढळ स्थान निर्माण केलं आहे. आपल्या जबरदस्त कारकिर्दीत त्यांनी अभिनेता अशोक सराफ यांच्यासोबत बरेच चित्रपट केले. अशोक सराफ आणि लक्ष्मीकांत बेर्डे यांची जोडी सिनेसृष्टीत लोकप्रिय आणि हिट होती. आता नुकत्याच दिलेल्या एका मुलाखतीत अशोक सराफ यांनी लक्ष्मीकांत यांच्या आठवणींना उजाळा दिला. यावेळी ते लाडक्या लक्ष्याबद्दल मनमोकळे होऊन बोलत होते. “माझ्याबद्दल त्याच्या मनात एक आदरयुक्त भीती होती. माझ्यासमोर तो फार काही बोलायचा नाही, वाटेल तसा वागायचा नाही..” असं त्यांनी यावेळी सांगितलं. यावेळी बोलताना अशोक सराफ म्हणाले की, “लक्ष्मीकांत बेर्डे खूप प्रतिभावान होता, त्याबद्दल काही वादच नाही. त्याने शून्यातून विश्व निर्माण केलं होतं. नट कुठलाही असो किंवा माणूस कुठलाही असो.. शून्यातून इतकं वर येणं फार कठीण असतं. सर्वांनाच ते जमत नाही. पण त्याने केलं. माझ्यासोबत त्याने जवळपास 50 चित्रपट केले. काम करता करता डेव्हलप करून तो कुठल्या कुठे गेला. मी जेव्हा टॉपला होतो तेव्हा तो सिनेसृष्टीत आला होता. त्यामुळे माझ्याबद्दल त्याच्या मनात एक आदरयुक्त भीती होती. माझ्यासमोर तो फार काही बोलायचा नाही, फालतूगिरी करायचा नाही, वाटेल तसा वागायचा नाही, कधी वाकड्यात जाऊन बोलायचा नाही. काय धमाल करायची ती इतरांसोबत, पण मी असताना तो कधीच असं करायचा नाही. हा त्याच्या स्वभावातील चांगुलपणा होता. आदरयुक्त भीतीमुळे तो माझ्याशी फार बोलायचा नाही. पण तो खूप प्रतिभावान होता. त्याच्या डान्सचे मूमेंट्स शार्प असायचे. तो फार मोठा डान्सर कधी नव्हताच. मीसुद्धा नव्हतो. पण त्याचे मूमेंट्स शार्प असायचे. माझ्यासोबत तो सहाय्यक भूमिकेत असायचा..” अशा अनेक आठवणी अशोक सराफ यांनी यावेळी बोलून दाखवल्या. सिनेरसिकांच्या मनावर लक्ष्याची जादू ! ‘लेक चालली सासरला’ चित्रपटाच्या माध्यमातून 1984 साली लक्ष्मीकांत बेर्डेंनी मराठी सिनेसृष्टीत पाऊल ठेवलं. त्यानंतर 80-90 च्या दशकात लक्ष्याने ‘धुमधडाका’, ‘दे दणादण’, ‘अशी ही बनवाबनवी’, ‘मज्जाच मज्जा’, ‘एक गाडी बाकी अनाडी’, ‘बाळाचे बाप ब्रह्मचारी’, ‘भुताचा भाऊ’, ‘थरथराट’, ‘हमाल दे धमाल’, ‘धडाकेबाज’ अशा अनेक चित्रपटात विविधांगी भूमिका साकारल्या. कधी गंभीर भूमिकेतून प्रेक्षकांना रडवलं. तर कधी विनोदी भूमिकेतून प्रेक्षकांना खळखळून हसवलं. त्यांच्या प्रत्येक भूमिकेने लोकांच्या मनात एक वेगळे स्थान निर्माण केले आहे. जरी ते आज हयात नसले तरी पिढ्यान-पिढ्या मराठी सिनेरसिकांच्या मनात कायम असणार आहेत.
