Aryaveer Sehwag Fifty : अफगाणिस्तानविरुद्ध आर्यवीर सेहवागचे वादळ! २८ चेंडूंत १२ धावा अन् पुढच्या २८ चेंडूंत असा फिरवला सामना; पाहा धडाकेबाज खेळी
Aryaveer Sehwag Fifty IND vs AFG Semifinal : आर्यवीर सेहवागच्या अर्धशतकाच्या जोरावर भारतीय संघाने अफगाणिस्तानविरुद्धच्या सेमीफायनल सामन्यात दमदार सुरुवात केली आहे.
Aryaveer Sehwag Fifty 300 Runs Milestone IND vs AFG U19 Asia Cup 2026 : अंडर-१९ आशिया चषक २०२६ स्पर्धेत भारताचा युवा सलामीवीर आर्यवीर सेहवागची बॅट चांगलीच तळपत आहे. युएईविरुद्ध १६० धावांची वादळी शतकी खेळी करून भारताला उपांत्य फेरीत पोहोचवल्यानंतर, आता अफगाणिस्तानविरुद्धच्या उपांत्य सामन्यातही आर्यवीरने आपला दबदबा कायम राखला आहे. अल अमरात क्रिकेट मैदानावर सलामीला उतरलेल्या आर्यवीरने सुरुवातीला खेळपट्टीवर स्थिरावण्यासाठी वेळ घेतला; मात्र त्यानंतर चौफेर फटकेबाजी करत शानदार अर्धशतक झळकावले.
षटकाराने पूर्ण केले अर्धशतक; कर्णधार लक्ष्यसोबत शतकी भागीदारी
अफगाणिस्तानविरुद्धच्या या महत्त्वपूर्ण लढतीत आर्यवीरने ५७ चेंडूंत ५१ धावांची धमाकेदार खेळी साकारली. एका क्षणी तो २८ चेंडूंत केवळ १२ धावांवर खेळत होता, पण गिअर बदलत त्याने ५६ चेंडूंत आपले अर्धशतक पूर्ण केले. विशेष म्हणजे, वडील वीरेंद्र सेहवागच्या शैलीत त्याने षटकार ठोकून अर्धशतकाचा टप्पा गाठला. मात्र, पुढच्याच चेंडूवर तो बाद झाला. या खेळीत त्याने ४ चौकार आणि ४ उत्तुंग षटकार लगावले, तसेच कर्णधार लक्ष्य रायचंदानीसोबत पहिल्या विकेटसाठी ११७ धावांची भक्कम भागीदारी रचली.
स्पर्धेत ३०० धावांचा गाठला पल्ला; चौकार-षटकारांच्या बाबतीतही अव्वल
ANOTHER HALF-CENTURY FOR AARYAVIR SEHWAG! 👏
Aaryavir brings up another impressive fifty but departs immediately after, scoring 51.
#AaryavirSehwag #AsiaCupU19 https://t.co/Y8n1KY49Ou
— OneCricket (@OneCricketApp) November 12, 2026
या अर्धशतकी खेळीसह आर्यवीर सेहवागने अंडर-१९ आशिया चषक २०२६ मध्ये ३०० धावांचा ऐतिहासिक टप्पा ओलांडला आहे. तो या स्पर्धेत सर्वाधिक धावा करणारा फलंदाज ठरला असून, त्याने ४ सामन्यांत १०१ च्या अविश्वसनीय सरासरीने तब्बल ३०३ धावा कुटल्या आहेत. यामध्ये १ शतक आणि २ अर्धशतकांचा समावेश आहे. आतापर्यंत २९ चौकार आणि १६ षटकार लगावत तो बाउंड्री मारण्याच्या यादीतही पहिल्या क्रमांकावर आहे.
इतर सर्व फलंदाज कोसो दूर; आर्यवीरचे एकहाती वर्चस्व
संपूर्ण स्पर्धेत अद्याप इतर कोणत्याही फलंदाजाला २५० धावांचा आकडाही गाठता आलेला नाही. पाकिस्तानचा उस्मान खान २३८ धावांसह दुसऱ्या स्थानावर आहे, तर इतर कोणत्याही भारतीय फलंदाजाला २०० धावांपर्यंत मजल मारता आलेली नाही. युएईविरुद्ध १७ चौकार आणि ७ षटकारांसह ठोकलेल्या १६० धावांनंतर अफगाणिस्तानविरुद्धही त्याने भारताला भक्कम पाया रचून दिला.
