मुंबई : शिवसेनेच्या नेत्या आणि मुंबईच्या महापौर किशोरी पेडणेकर यांनी महाराष्ट्र भाजपाचे प्रदेशाध्यक्ष चंद्रकांत पाटील यांच्यावर खोचक शब्दांमध्ये टीका केली आहे. मुख्यमंत्री उद्धव ठाकरेंवर टीका करताना चंद्रकांत पाटील यांनी मुख्यमंत्र्यांची पत्नी रश्मी ठाकरेंचा उल्लेख केला होता. याच मुद्द्यावरुन पेडणेकर यांनी संताप व्यक्त केला आहे. रश्मी ठाकरे कधी राजकारणात नसताना त्यांचं नाव चंद्रकांत पाटील का घेतात असा सवाल उपस्थित करत सतत प्रकाश झोतात असणाऱ्या अमृता फडणवीस यांना विरोधी पक्षनेता बनवा असा खोचक सल्लाही पेडणेकर यांनी दिला आहे.

चंद्रकांत पाटील यांनी राज्यात आजपासून सुरु झालेल्या हिवाळी अधिवेशनाच्या आधीच मुख्यमंत्र्यांवर टीका केली.  मंगळवारीही पाटील यांनी अशीच टीका केली होती. याच टीकेसंदर्भात पत्रकारांनी महापौर पेडणेकर यांना, रश्मी ठाकरेंकडे मुख्यमंत्री पद जाईल अशी शक्यता चंद्रकांत पाटील यांनी व्यक्त केली आहे, असा प्रश्न विचारला असता महापौरांनी त्यावर सविस्तर उत्तर दिले.

“चंद्रकांत पाटील मोठे नेते आहेत. पण कधी कधी मला त्यांची किव करावीशी वाटते. माझ्यासारख्यांनी त्यांच्याबद्दल असं बोलणं चुकीचं आहे असं माझे संस्कार सांगतात. इतक्या मोठ्या व्यक्तीबद्दल मी नाही बोललं पाहिजे असे माझ्या पालकांचे, गुरुंचे आणि बाळासाहेबांचे संस्कार आहेत. पण ते जर एक पत्नी म्हणून रश्मी उद्धव ठाकरेंबद्दल बोलत असतील तर अमृता फडणवीस यांना ते विरोधी पक्षनेता करणार आहेत का हे सांगावे. कारण अमृता फडणवीस या जास्त प्रकाशझोतात आहेत. रश्मी वहिनी कधीच प्रकाशझोतात नसतात तरी त्यांचं नाव घेतलं जातं,” असं म्हणत पेडणेकर यांनी संताप व्यक्त केला.

पुढे बोलताना पेडणेकर यांनी थेट पंतप्रधान मोदींची यासंदर्भात भेट घ्यावी लागेल असेही वक्तव्य केले. “अरे तुम्हाला कळतंय का? एखाद्या स्त्रीचं तुम्ही किती हनन कराल? एक वेळेस आदित्य ठाकरेंचं नाव घेणं समजून शकते ते मंत्री आहेत. पण रश्मी वहिनींचं नाव का घेता? त्यात तर कधीच नसतात. तुमच्या फडणवीस बाई आहेत ना त्या प्रकाशझोतात आहेत. मग त्यांना बनवा ना विरोधी पक्षनेता.

महिलांची नावं कशाला घेता. हे अजिबात चालू देणार नाही. हे काय चाललंय. तुम्ही महाराष्ट्राच्या राजकारणाची पातळी किती खाली आणणार आहात? आता याच कामासाठी आम्हाला पंतप्रधानांची भेट घ्यावी लागेल. तुमची भारतीय जनता पार्टी हिंदू म्हणून पुढे येते पण महिलांचं हनन करणं ही हिंदू संस्कृती नाही,” असे पेडणेकर म्हणाल्या.