Raigad Fort : महाराष्ट्राचे प्रेरणास्थान आणि स्वराज्याची राजधानी असलेल्या किल्ले रायगडावर छत्रपती शिवरायांच्या समाधीस्थळाचे दर्शन घेण्यासाठी देशभरातून शिवभक्त येत असतात.

तर, वर्षभर किल्ला पाहण्यासाठी पर्यटकही भेट देत असतात. आता, किल्ले रायगडावर जाण्यासाठी आता सरकारी नवीन रोपवे उभारला जाणार असून केवळ 50 ते 100 रुपयांमध्ये शिवभक्तांना गडावर जाता येणार आहे, अशी माहिती माजी खासदार संभाजीराजे छत्रपती यांनी दिली आहे.

रायगड प्राधिकरण विभागाचे अध्यक्ष आणि युवराज छत्रपती संभाजी राजे यांनी त्यांच्या सोशल मिडिया पोस्टद्वारे नवीन रोपवेबाबत माहिती दिली आहे. दुर्गराज रायगडावर सध्या खाजगी मालकीच्या रोप-वे मधून साधारण 350 रुपये प्रतिव्यक्ती आकारले जातात.

मात्र हाच प्रवास आता केवळ 50 ते 100 रुपयांमध्ये करता येणार आहे. याबाबत आपण दिल्ली येथील पुरातत्व विभागाकडे पाठपुरावा करत होतो त्यानंतर आता या पाठपुराव्याला यश मिळाले असून नवीन शासकीय रोपवे उभारणीसाठी मान्यता मिळाली असल्याच त्यांनी सांगितले.

दुर्गराज रायगडावर महाराष्ट्र शासनाच्या नवीन अत्याधुनिक रोपवे उभारणीस पुरातत्व विभागाने मान्यता दिली आहे. याचबरोबर, संवर्धनाच्या कामांसाठी सध्याच्या रोपवेकडून आकारल्या जाणाऱ्या कोट्यवधी रुपयांची बचत होणार असल्याची माहिती माजी खासदार संभाजीराजे यांनी दिली.