नवी दिल्ली – मध्य प्रदेशातील छिंदवाडा येथे विषारी कफ सिरप सेवनामुळे २६ मुलांचा मृत्यू झाल्याच्या प्रकरणात आणखी एक धक्कादायक बाब समोर आली आहे. पोलिस तपासात असे दिसून आले आहे की, सरकारी रुग्णालयातील डॉक्टर डॉ. प्रवीण सोनी, जे स्वतःचे खाजगी क्लिनिक देखील चालवत होते, त्यांनी मुलांसाठी एक सिरप लिहून दिले जे प्रत्यक्षात उपलब्धच नव्हते.

त्यांची पत्नी, ज्योती, जी एक मेडिकल स्टोअर चालवते, तिने प्रिस्क्रिप्शनवर लिहिलेले सिरपऐवजी कोल्ड्रिफ कफ सिरप दिले. डॉ. प्रवीण यांनी जाणूनबुजून चुकीचे सिरप लिहून दिले जेणेकरून इतर मेडिकल स्टोअर्स ते पुरवू शकणार नाहीत.

पोलिसांनी असे अनेक प्रिस्क्रिप्शन तपासले, ज्यामध्ये नेस्ट्रो-पीएल कफ सिरप लिहून देण्यात आले होते, जे प्रत्यक्षात उपलब्धच नसल्याचे डॉक्टरांचे म्हणणे आहे. जेव्हा मुलाचे कुटुंब औषध खरेदी करण्यासाठी गेले तेव्हा त्यांना कोल्ड्रिफ सिरप देण्यात आले, ज्यामुळे संबंधित मुलाची तब्येत बिघडली आणि शेवटी त्याचा मृत्यू झाला.

डॉ. सोनी आणि त्यांची पत्नी या प्रकरणात तुरुंगात आहेत. कोल्ड्रिफ सिरप बनवणाऱ्या कंपनीचे मालक आणि एका रासायनिक विश्लेषकालाही अटक करण्यात आली आहे. चाचण्यांमध्ये कोल्ड्रिफ सिरपमध्ये ४२ टक्के डीईजीचे प्रमाण आढळून आले, जे मुलांच्या मृत्यूचे मुख्य कारण होते.