Anna Hazare : अण्णांंच्या आंदोलनाला RSS-BJP चा छुपा पाठिंबा होता; सोनिया गांधींचा गंभीर आरोप, अण्णा हजारे भडकले थेट म्हणाले….
Anna Hazare : सोनिया गांधी यांनी आपल्या पुस्तकात अण्णा हजारे यांच्या 'इंडिया अगेन्स्ट करप्शन' आंदोलनाला राष्ट्रीय स्वयंसेवक संघ (RSS) आणि भारतीय जनता पक्षाचा (BJP) छुपा पाठिंबा होता, असा गंभीर आरोप केला आहे.
Anna Hazare : काँग्रेसच्या ज्येष्ठ नेत्या सोनिया गांधी यांच्या ‘Belonging: A Journey of Love’ आत्मचरित्रातील घटना चर्चेत आहे. या पुस्तकातून सोनिया गांधी यांनी भारतीय राजकारणातील अनेक महत्त्वाच्या घटनांवर आपली भूमिका मांडली आहे.
माजी पंतप्रधान इंदिरा गांधी यांनी घेतलेला आणीबाणीचा निर्णय यांसह अनेक राजकीय घडामोडींवर त्यांनी भाष्य केलं आहे. आता या पुस्तकातील ज्येष्ठ समाजसेवक अण्णा हजारे यांच्या भ्रष्टाचारविरोधी आंदोलनासंदर्भातील दाव्याची जोरदार चर्चा रंगली आहे.
सोनिया गांधी यांनी आपल्या पुस्तकात अण्णा हजारे यांच्या ‘इंडिया अगेन्स्ट करप्शन’ आंदोलनाला राष्ट्रीय स्वयंसेवक संघ (RSS) आणि भारतीय जनता पक्षाचा (BJP) छुपा पाठिंबा होता, असा गंभीर आरोप केला आहे. या आंदोलनामुळे तत्कालीन काँग्रेसच्या नेतृत्वाखालील यूपीए सरकारवर राजकीय दबाव निर्माण झाला होता, असंही त्यांनी नमूद केलं आहे. या आरोपांवर अण्णा हजारे यांनी प्रतिक्रिया दिली असून, कोणत्याही राजकीय पक्षाशी आपला संबंध नसल्याचं त्यांनी स्पष्ट केलं आहे.
‘माझा कोणत्याही पक्षाशी संबंध नाही’; अण्णा हजारेंचं स्पष्ट उत्तर
सोनिया गांधी यांच्या पुस्तकातील दाव्याबाबत विचारण्यात आल्यानंतर अण्णा हजारे यांनी आपली भूमिका मांडली. ते म्हणाले, “जबाबदार व्यक्तीने जबाबदारीनेच बोललं पाहिजे. अन्यथा स्वतःची किंमत कमी होते. माझा कोणत्याही पक्षासोबत अथवा पार्टीसोबत संबंध नाही. मी जे काही करतो, ते देशहितासाठी आणि समाजाच्या हितासाठी करतो.” अशा शब्दांत अण्णा हजारेंनी आरोपांवर प्रत्युत्तर दिलं.
काय होतं अण्णा हजारेंचं भ्रष्टाचारविरोधी आंदोलन?
अण्णा हजारे यांनी २०११ मध्ये दिल्लीत जंतर-मंतर येथे ‘इंडिया अगेन्स्ट करप्शन’ आंदोलनाचं नेतृत्व केलं होतं. देशातील भ्रष्टाचाराला आळा घालण्यासाठी प्रभावी लोकपाल कायदा लागू करावा आणि भ्रष्टाचाराच्या विरोधात कठोर कारवाई व्हावी, या मागणीसाठी हे आंदोलन करण्यात आलं होतं. या आंदोलनाला देशभरातून मोठा प्रतिसाद मिळाला होता. हजारो नागरिकांनी आंदोलनात सहभाग घेतला होता.
या आंदोलनामुळे तत्कालीन पंतप्रधान मनमोहन सिंग यांच्या नेतृत्वाखालील यूपीए सरकारवर मोठा राजकीय दबाव निर्माण झाला होता. सोनिया गांधी यांनी आपल्या आत्मचरित्रात विरोधकांचा उद्देश यूपीए सरकारची सत्ता संपवण्याचा होता, असा दावा देखील केला आहे.
Pune News: पुणेकरांना दिलासा! उद्याचा पाणीकपात रद्द करण्याचा निर्णय; नियमित पाणीपुरवठा सुरू
