मुंबई – राष्ट्रवादी काँग्रेसचे (अजित पवार गट) आमदार अण्णा बनसोडे यांनी विधानसभेच्या उपाध्यक्षपदावर बिनविरोध निवड होऊन बाजी मारली आहे. उपमुख्यमंत्री अजित पवार यांचे कट्टर समर्थक असलेल्या बनसोडे यांच्या निवडीची औपचारिक घोषणा विधानसभा अध्यक्ष राहुल नार्वेकर उद्या (बुधवारी) सभागृहात करणार आहेत. या पदासाठी महायुतीकडून बनसोडे यांचा एकमात्र अर्ज आला होता, जो सोमवारी पडताळणीत वैध ठरला. त्यामुळे त्यांची निवड बिनविरोध निश्चित झाली. तिसऱ्यांदा विधानसभेत, आता उपाध्यक्षपदाची जबाबदारी – पुणे जिल्ह्यातील पिंपरी विधानसभा मतदारसंघाचे प्रतिनिधित्व करणारे अण्णा बनसोडे यांनी राजकीय कारकीर्दीत अनेक टप्पे गाठले आहेत. महापालिकेत तीन वेळा नगरसेवक आणि स्थायी समितीचे अध्यक्ष म्हणून त्यांनी काम पाहिले आहे. 2009 मध्ये ते पहिल्यांदा आमदार झाले, 2014 मध्ये पराभव पत्करावा लागला, पण 2019 मध्ये त्यांनी पुन्हा विधानसभेत प्रवेश केला. राष्ट्रवादीतील फुटीदरम्यान अजित पवार यांच्यासोबत राहण्याचा निर्णय घेत 2024 मध्ये ते तिसऱ्यांदा निवडून आले. आता उपाध्यक्षपदाची जबाबदारी मिळाल्याने त्यांचे राजकीय वजन आणखी वाढले आहे. मंत्रिपदाचे स्वप्न अधुरे, पण उपाध्यक्षपदावर समाधान – पिंपरी-चिंचवड या औद्योगिक शहराला आजवर कॅबिनेट किंवा राज्यमंत्रिपद मिळालेले नाही. या शहरातील आमदार बनसोडे आणि भोसरीचे भाजप आमदार महेश लांडगे हे दोघेही मंत्रिपदासाठी इच्छुक होते. मात्र, मंत्रिपदाऐवजी बनसोडे यांना मंत्रिपदाचा दर्जा असलेले विधानसभेचे उपाध्यक्षपद देऊन त्यांचा सन्मान करण्यात आला आहे. या निवडीमुळे पिंपरी-चिंचवडला राज्याच्या विधिमंडळात महत्त्वाचे स्थान मिळाले आहे. अजित पवारांचा बालेकिल्ला परत मिळवण्याची खेळी? पिंपरी-चिंचवड हा एकेकाळी अजित पवारांचा गड मानला जायचा. मात्र, 2017 मध्ये भाजपने या भागात आपली पकड मजबूत केली. सध्या या शहरात भाजपचे चार आमदार (दोन विधानसभा, दोन विधानपरिषद) आहेत, तर राष्ट्रवादीचा एकमेव आमदार आहे. महायुतीतील सत्तेत सहभागी असलेल्या अजित पवारांनी बनसोडे यांना उपाध्यक्षपद देऊन आपल्या मित्रपक्षाला बळ दिले आहे. यामुळे बनसोडे यांना विधिमंडळात प्रभावी भूमिका निभावता येणार असून, महापालिकेत पुन्हा राष्ट्रवादीची सत्ता आणण्यासाठी अजित पवार प्रयत्नशील असल्याची चर्चा आहे. उपाध्यक्षपदासाठी स्पर्धा, पण बनसोडे अव्वल – या पदासाठी राष्ट्रवादीचे राजकुमार बडोले, संजय बनसोडे आणि अण्णा बनसोडे यांची नावे चर्चेत होती. अखेर अण्णा बनसोडे यांनी बाजी मारली. त्यांच्या बिनविरोध निवडीने अजित पवार गटातील त्यांचे स्थान आणखी भक्कम झाले आहे. उद्या विधानसभेत होणारी घोषणा ही केवळ औपचारिकता असेल, कारण बनसोडे यांचे उपाध्यक्षपद आता निश्चित आहे.
