Ankita Walawalkar : ‘बिग बॉस मराठी’ फेम अंकिता वालावलकर आणि धनंजय ‘डीपी’ पवार यांची मैत्री प्रेक्षकांनी घरात पाहिली होती. गेल्या वर्षी शोमध्ये अंकिताने डीपीला राखी बांधली होती. यंदाच्या रक्षाबंधनात मात्र अंकिता भारतात नसल्याने प्रत्यक्ष राखी बांधू शकली नाही. तरीदेखील तिने आपल्या भावासाठी खास गिफ्ट आणि एक भावुक पत्र पाठवत नातं साजरं केलं.

डीपीने आपल्या युट्युब चॅनेलवर या गिफ्टचा अनबॉक्सिंग व्हिडीओ शेअर केला आहे. त्यात तो अंकिताने दिलेलं गिफ्ट उघडताना दिसतो. गिफ्टमध्ये त्याच्यासाठी काही स्टायलिश शर्ट्स होते. त्याबरोबरच अंकिताने एक पत्रही पाठवलं होतं, ज्यात तिने भावनांचा ओलावा व्यक्त केला.

पत्रात अंकिताने लिहिलं

“प्रिय डीपीदादा, गेल्या वर्षी ‘बिग बॉस’च्या घरात मी तुम्हाला राखी बांधली होती. तो दिवस आठवला की अंगावर काटा येतो. काय करावं ते कळत नव्हतं, तेव्हा आपणच एकमेकांचा आधार बनलो. यावर्षी मी पूर्वनियोजित कामामुळे भारतात नाही, पण आपलं नातं साजरं झालंच पाहिजे. डीपी स्टाईलचे काही शर्ट पाठवते आहे, आवडले तर रक्षाबंधनच्या दिवशी नक्की घाला.”

पुढे तिने लिहिलं …

“माझ्या नावाची राखी ताईंकडून बांधून घ्या. मला काही गिफ्ट नको, पण खरी गरज पडली तर हक्काने हाक मारा. गेल्यावर्षी तुम्ही दिलेला आधार मी कधीही विसरणार नाही, अबोला असेल तरीही नाही. तुम्हाला माहीत आहे मी जास्त रागावत नाही, पण चुकू नये म्हणून ऐकवते. त्यामागे उद्देश चुका कमी करण्याचा असतो. त्यासाठी मला तुमच्या बाबांसोबत बसावं लागेल. रक्षाबंधनच्या खूप शुभेच्छा. तुमचं वादळ.”

अंकिताच्या या खास गिफ्ट आणि भावपूर्ण पत्राने डीपी भावुक झाला असून चाहत्यांनीही या भावंडांच्या नात्याचं कौतुक केलं आहे.