Anil Sawant meets Sharad Pawar ।  राज्यातील विधानसभा निवडणुकीमुळे सर्व पक्ष आपल्या उमेदवारांच्या निवडीसाठी रात्रंदिवस एक करताना दिसून येत आहेत . त्यात एका पक्षातून दुसऱ्या पक्षात जाणाऱ्यांची देखील संख्या रोजच वाढत आहे. दरम्यान, शिंदे गटाचे नेते आणि मंत्री तानाजी सावंत यांना त्यांच्याच घरातून बंडखोरीस सामोरे जावे लागत असल्याचे दिसत आहे. कारण, त्यांचे पुतणे अनिल सावंत हे तुतारी हाती घेणार असल्याचे सांगण्यात येत आहे.

मंत्री तानाजी सावंत यांचे पुतणे अनिल सावंत हे शरद पवार यांच्या भेटीसाठी सिल्वर ओक वर पोहोचले आहेत. तानाजी सावंत यांचे पुतणे अनिल सावंत हे पंढरपूर-मंगळवेढा विधानसभेमधून निवडणूक लढण्यास इच्छुक असल्याचे सांगण्यात येत आहे .  त्यामुळे त्यांच्या या भेटीला सध्या महत्व प्राप्त झाले आहे.

धैर्येशील मोहिते पाटलांनी करून दिली भेट Anil Sawant meets Sharad Pawar । 
दरम्यान, राज्यातील विधानसभेच्या अगोदर धैर्येशील मोहिते पाटलांनी याआधी पंढरपूर आणि मंगळवेढ्यातील इच्छूक उमेदवारांची शरद पवारांसोबत भेट घालून दिली होती. यामध्ये तानाजी सावंतांचे पुतणे अनिल सावंत देखील उपस्थित होते. त्यानंतर अनिल सावंत आज पुन्हा एकदा शरद पवारांच्या भेटीसाठी पोहोचले आहेत.

पंढरपूर मंगळवेढा मतदारसंघातून निवडणूकीसाठी अनिल सावंत इच्छूक आहेत. मात्र, ही जागा सध्या भाजपकडे आहे. भाजपचेच माजी आमदार प्रशांत परिचारक, भगीरथ भालके हे दाघेही या जागेसाठी निवडणूक लढवण्यास इच्छूक असून यांचाही प्रयत्न राष्ट्रवादीचे अध्यक्ष शरद पवार यांची तुतारी हाती घेण्याच्या तयारीत आहेत.

उमेदवारीसाठी आरोग्यमंत्री तानाजी सावंत यांचे पुतणे अनिल सावंत यांनी आधी पुण्यात थेट शरद पवारांची भेट घेतली. पंढरपूर मंगळवेढा परिसरातील भैरवनाथ साखर कारखान्याचा कारभार ते पाहतात. तानाजी सावंत यांचे बंधू शिवाजी सावंत यांनी माढा विधानसभा मतदारसंघाच्या जागेसाठी दावा केल्यानंतर त्यांचा पुतण्या अनिल सावंत यांनी पंढरपुर मंगळवेढा मतदारसंघाच्या जागेसाठी निवडणूक लढवण्याची इच्छा व्यक्त केली आहे. आमदारकीसाठी शरद पवारांच्या राष्ट्रवादीला जवळ करत तुतारी हाती घेण्याची शक्यता देखील या निमित्ताने वर्तवली जात आहे.

कोणत्या पक्षाचे कोणते उमेदवार? Anil Sawant meets Sharad Pawar । 
पंढरपूर विधानसभा निवडणुकीसाठी भाजपने विद्यमान आमदार समाधान आवताडे यांना पुन्हा उमेदवारी मिळण्याची शक्यता आहे. मनसेचे नेते दिलीप धोत्रे यांची उमेदवारी जाहीर झाली असून त्यांचा प्रचारही सुरु झाला आहे. तर दुसरीकडे भाजपचे दुसरे नेते माजी आमदार प्रशांत परिचारक यांनी देखील या मतदारसंघातून उमेदवारीची मागणी केली आहे. ते देखील इच्छुक उमेदवार असून त्यांनी निवडणुकीसाठीची चाचपणी सुरू केली आहे. तर प्रशांत परिचारक यांच्या शिष्टमंडळाने शरद पवारांची भेट घेऊन उमेदवारीची मागणी केलेली आहे. तर बीआरएस पक्षाचे भगीरथ भालके यांनी देखील पुन्हा एकदा राष्ट्रवादी काँग्रेस शरद पवारांकडे आपली पावले वळवली आहे.