Earthquake: ताजिकिस्तानमध्ये शुक्रवारी पहाटे झालेल्या ५.३ रिश्टर स्केल तीव्रतेच्या भूकंपाचे धक्के भारताच्या जम्मू-काश्मीर राज्यापर्यंत जाणवले. सुदैवाने, या नैसर्गिक आपत्तीत अद्याप कोणतीही जीवित किंवा वित्तहानी झाल्याचे वृत्त समोर आलेले नाही.

प्रादेशिक हवामान खात्याचे संचालक मुख्तार अहमद यांनी दिलेल्या माहितीनुसार, हा भूकंप पहाटे २ वाजून ४४ मिनिटांनी झाला. भूकंपाचा केंद्रबिंदू ताजिकिस्तानमध्ये जमिनीच्या पृष्ठभागापासून ११० किलोमीटर खोलवर होता. त्याची अचूक स्थिती ३८.२६ अंश उत्तर अक्षांश आणि ७३.४२ अंश पूर्व रेखांश अशी नोंदवण्यात आली आहे.

There’s been a distributed cluster of magnitude 4-5+ earthquakes in and around Tajikistan. This is a bit anomalous, it would be wise to watch this location closely, as powerful M7-8+ earthquakes are possible here pic.twitter.com/NkJbMK4DyT

— Stefan Burns (@StefanBurnsGeo) January 9, 2026

भूकंपाचे धक्के इतके तीव्र होते की, जम्मू-काश्मीरमधील अनेक जिल्ह्यांत नागरिकांना ते स्पष्टपणे जाणवले. गांदरबल जिल्ह्यातील स्थानिक रहिवाशांनी सांगितले की, पहाटेच्या वेळी अचानक घरातील भांडी पडू लागल्याने आणि खिडक्यांच्या आवाजाने त्यांना जाग आली. भूकंपाचा जाणीव होताच अनेक नागरिक घराबाहेर सुरक्षित स्थळी धावले.

२००५ च्या आठवणी ताज्या

काश्मीरची भौगोलिक रचना भूकंपाच्या दृष्टीने अत्यंत संवेदनशील (Seismic Zone) मानली जाते. शुक्रवारी बसलेल्या धक्क्यांमुळे २००५ च्या भीषण भूकंपाच्या आठवणी ताज्या झाल्या. ८ ऑक्टोबर २००५ रोजी ७.६ तीव्रतेच्या भूकंपाने या भागाला हादरवले होते, ज्याचा केंद्रबिंदू मुजफ्फराबादजवळ होता. त्या भीषण आपत्तीत ८० हजारांहून अधिक लोकांचा बळी गेला होता आणि हजारो इमारती जमीनदोस्त झाल्या होत्या.

सध्याच्या भूकंपात जीवितहानी झाली नसली तरी, प्रशासनाने खबरदारी म्हणून नागरिकांना सतर्क राहण्याचे आवाहन केले आहे.