नवी दिल्ली – लोकसभा निवडणुकीनंतर आता लोकसभेच्या सभापती पदाकडे सगळ्यांच्या नजरा खिळल्या आहेत. सगळ्यांत मोठा पक्ष ठरलेल्या भारतीय जनता पार्टीकडे हे पद जाणार असे एनडीए आघाडीतील सूत्रांच्या म्हणण्यावरून स्पष्ट होते आहे. मात्र त्याचवेळी उपसभापती पद भाजपकडून त्यांच्या एखाद्या मित्रपक्षाला सोडले जाऊ शकते अशीही शक्यता वर्तवली जाते आहे.

इंडिया ही विरोधी पक्षांची आघाडीही सभापती पदासाठी कोणाचे नाव सत्ताधारी आघाही जाहीर करते याची वाट पाहते आहे. जर भाजपने मित्रपक्षाला हे पद सोडले तर मात्र इंडिया आघाडीकडून सौम्य भूमिका घेतली जाऊ शकते असा कयास वर्तवला जातो आहे. मात्र उमेदवार भाजपचाच असेल तर त्याच्या विरोधात विरोधकांकडून पूर्ण ताकद पणाला लावली जाऊ शकते.

येत्या २४ तारखेपासून संसदेचे अधिवेशन सुरू होणार आहे. पहिले दोन दिवस नव्या सदस्यांचा शपथविधी होईल. त्यानंतर २६ तारखले सभापती पदाची निवडणूक होण्याचे वेळापत्रक आहे. एनडीएचा उमेदवार कोण असावा यासाठी अन्य पक्षांशी चर्चा करून सहमती घडवून आणण्याची जबाबदारी भाजपकडून ज्येष्ठ नेते राजनाथ सिंह यांच्याकडे सोपवण्यात आली आहे.

राजनाथ यांच्याशी चर्चा झाल्यानंतरच हे पद भाजपसाठी सोडण्याकरता एनडीएतील अन्य पक्ष तयार झाल्याचे सांगण्यात आले. संयुक्त जनता दलाने तर पाठिंब्याची घोषणाही केली आहे. तथापि, स्वत: भाजपने मात्र अद्याप उमेदवाराचे नाव जाहीर केले नाही. भाजपच्या एका वरिष्ठ नेत्याच्या म्हणण्यानुसार २०१९ प्रमाणे पुन्हा एकदा चकित करणारे नाव पक्षाकडून जाहीर केले जाऊ शकते. सूत्रांच्या म्हणण्यानुसार उपसभापती पदासाठीही एनडीएची चर्चा झाली आहे.

सामान्यत: उपसभापती पद हे विरोधी पक्षांसाठी सोडण्याची प्रथा आहे. मात्र २०१४ मध्ये भाजपने तत्कालीन सहकारी पक्ष अद्रमुकचे नेते के. एम. थंबुदुराई यांच्यासाठी हे पद सोडले होते. तर २०१९ मध्ये कोणाला उपसभापती बनवलेच गेले नव्हते. आता एनडीएमध्ये तेलगु देसम पक्ष हा दुसऱ्या क्रमाकांचा पक्ष असून त्यांना हे पद सोडले जाण्याची शक्यता वर्तवली जाते आहे.