शिरूर :  इंस्टाग्रामवरून ओळख झालेल्या मित्रावर विश्वास ठेवून दिलेली सुमारे एक लाख ४० हजार रुपयांची सोन्याची चैन घेऊन आरोपी पसार झाल्याची धक्कादायक घटना शिरूर शहरातील ओमरूद्रा कॉलनी येथे घडली. याप्रकरणी शिरूर पोलीस ठाण्यात गुन्हा दाखल करण्यात आला आहे. एका २२ वर्षीय तरुणीसोबत हा धक्कादायक प्रकार घडला आहे.

या तरुणीने दिलेल्या फिर्यादीत नमूद केल्याप्रमाणे, तिची इंस्टाग्रामवरून ओळख पवन आंबादास सुरवसे (रा. डिसलेवाडी, जामखेड, ता. कर्जत, जि. अहिल्यानगर) याच्याशी झाली होती. ओळखीनंतर पवनने तिला आणि तिच्या मित्रमैत्रिणींना लोणावळ्याला फिरायला जाण्याचे आमंत्रण दिले.

२४ जुलै रोजी तरुणीने आपल्या मैत्रमैत्रिणाींसोबत लोणावळा येथे प्रवास केला. दोन दिवस प्रवासानंतर २६ जुलै रोजी सकाळी साडेअकरा वाजता ते शिरूरला परत आले. घरासमोर पोहोचल्यावर पवनने तरुणीच्या गळ्यातील अंदाजे दीड तोळे वजनाची सोन्याची चैन (किंमत सुमारे १ लाख ४० हजार) ज्यावर गणपतीचे पेंडंट होते ते त्याने पाहण्यासाठी मागितले.

तरुणीने विश्वासाने ती चैन पवनच्या हातात दिल्यावर, त्याने ती आपल्या गळ्यात घालून, “मीही अशीच चैन बनवणार आहे,” असे सांगितले. मात्र, तरुणी गाडीतून खाली उतरल्यावर पवन गाडी घेऊन तिथून पसार झाला आणि पुन्हा परतलाच नाही.

फिर्यादीत नमूद केल्याप्रमाणे, तरुणीने वारंवार फोन करून त्याच्याशी संपर्क साधण्याचा प्रयत्न केला. मात्र, त्याने तिचे फोन उचलले नाहीत आणि तिची चैन परत दिली नाही. परिणामी, हा प्रकार विश्वासघातासह फसवणुकीचा गुन्हा ठरला. या प्रकरणी पोलीस हवालदार शिंदे यांनी गुन्हा नोंदवला असून तपासाची जबाबदारी पोलीस हवालदार जगताप यांच्याकडे देण्यात आली आहे.

सोशल मीडियावर वापरताना काळजी घ्या!

शिरूर तालुक्यासह जिल्ह्यात अशाप्रकारे इंस्टाग्राम, फेसबूक, व्हाटसअप, शेअरचॅट या सोशल मीडियावरून ओळख वाढवून फसवणूक केल्याचे प्रकार वाढीस लागले असून नागरिकांनी सोशल मीडियावर नवीन ओळखींबाबत अत्यंत सतर्कता बाळगणे आवश्यक आहे.