Amol Kolhe- खरीप हंगाम 2026 मध्ये ट्रिगर-1 लागू झालेल्या राज्यातील 265 तालुक्यांमध्ये विविध दुष्काळी उपाययोजना व सवलती लागू करण्यात आल्या आहेत. मात्र, या यादीत पुणे जिल्ह्यातील जुन्नर तालुक्याचा समावेश करण्यात आलेला नाही. जुन्नर तालुक्यातील, विशेषतः आणे पठार परिसरातील सद्यस्थिती गंभीर असल्याने तालुक्याचा दुष्काळग्रस्त यादीत समावेश करून शेतकर्‍यांना शासकीय मदत द्यावी,

अशी मागणी खासदार डॉ. अमोल कोल्हे यांनी मुख्यमंत्री देवेंद्र फडणवीस यांच्याकडे निवेदनाद्वारे केली आहे. जुन्नर तालुक्यात अपुर्‍या पर्जन्यमानामुळे खरीप पिकांवर मोठा परिणाम झाला असून अनेक ठिकाणी पिकांचे नुकसान झाले आहे. पाणीटंचाईमुळे शेतकरी आणि नागरिकांनाही अडचणींचा सामना करावा लागत आहे. विशेषतः बेल्हे महसूल मंडळातील आणे, पेमदरा, शिंदेवाडी, नळवणे व व्हरुंडी या गावांमध्ये पाणीटंचाईची परिस्थिती निर्माण झाली आहे.

या परिसरात मोठ्या प्रमाणावर सोयाबीनची लागवड करण्यात आली होती. मात्र, पावसाचे प्रमाण कमी राहिल्याने सोयाबीनच्या वाढीवर आणि उत्पादनावर परिणाम झाला असून शेतकर्‍यांचे आर्थिक नुकसान झाले आहे. आणे पठार व परिसर पाणीटंचाईस संवेदनशील असून अपुर्‍या पावसाचा शेतीबरोबरच पिण्याच्या पाण्याच्या उपलब्धतेवरही परिणाम झाला आहे.

लगतच्या पारनेर तालुक्याचा दुष्काळी उपाययोजनांच्या यादीत समावेश करण्यात आला असताना जुन्नर तालुक्याला वगळण्यात आले आहे. त्यामुळे जुन्नर तालुक्यातील प्रत्यक्ष परिस्थितीचा गांभीर्याने विचार करून शासन निर्णयाचा फेरविचार करावा. तालुक्याचा दुष्काळग्रस्त म्हणून समावेश झाल्यास शासनाच्या विविध दुष्काळी उपाययोजना, सवलती आणि पात्र शेतकरी कुटुंबांना मिळणार्‍या मदतीचा लाभ मिळू शकणार आहे.